O‘zbekiston va Rossiya tarixiy tadqiqotlarda hamkorlik qiladi
O‘zbekistonning eng yangi tarixi masalalari bo‘yicha Muvofiqlashtiruvchi-metodik markaz Rossiya Federatsiyasining “Ilmiy kommunikatsiyalar instituti” bilan hamkorlik to‘g‘risida memorandum imzoladi. Bu haqda Zamin.uz xabar berdi.
Ushbu kelishuv ilmiy tadqiqotlar darajasini oshirish, akademik nashrlar sifatini yaxshilash va “O‘zbekistonning eng yangi tarixining dolzarb masalalari” nomli ilmiy jurnalning xalqaro maydondagi raqobatbardoshligini kuchaytirishga qaratilgan. Hamkorlik doirasida ilmiy maqolalarni tayyorlash va tahrir qilish jarayonlarini takomillashtirish, xalqaro standartlarga mos nashr etish amaliyotini joriy qilish rejalashtirilgan.
Shuningdek, tahririyat a’zolari va tadqiqotchilar tajriba almashadi. Bu esa jurnal mazmuni va sifatini yanada oshirishga, uning xalqaro ilmiy bazalardagi mavqeini mustahkamlashga xizmat qiladi.
Ushbu hamkorlik zamonaviy ilmiy kommunikatsiyalarni rivojlantirish va milliy tarix bo‘yicha tadqiqotlarni xalqaro ilmiy hamjamiyatga yetkazish uchun muhim ahamiyat kasb etadi. Mutaxassislarning fikriga ko‘ra, memorandumning imzolanishi O‘zbekistonda tarixiy tadqiqotlar sifatini oshirish va ilmiy nashrlarning xalqaro miqyosda munosib o‘rin egallashiga zamin yaratadi.
