O‘zbekiston Tinchlik kengashiga asoschi sifatida taklif etildi
AQSH Prezidenti Donald Tramp O‘zbekistonga xalqaro Tinchlik kengashida doimiy o‘rin egallashni taklif qildi. Bu haqda Zamin.uz xabar berdi.
Prezident matbuot xizmatining xabar berishicha, Tramp tomonidan O‘zbekiston Prezidenti Shavkat Mirziyoyevga rasmiy maktub yo‘llangan. Ushbu maktubda Yaqin Sharqda tinchlikni ta’minlash va mojarolarni hal qilishga qaratilgan xalqaro tashabbusga O‘zbekistonni qo‘shilish taklifi ilgari surilgan.
Maktubga ko‘ra, mazkur tashabbus 2025-yil 29-sentabr kuni e’lon qilingan bo‘lib, BMT Xavfsizlik Kengashining 2803-sonli rezolyutsiyasi bilan tasdiqlangan. Tashabbusning maqsadi uzoq muddatli tinchlik, barqarorlik va xavfsizlikni ta’minlash uchun yangi xalqaro tuzilma – Tinchlik kengashini tashkil etishdan iborat.
O‘zbekiston ushbu kengashga asoschi davlat sifatida qo‘shilishga taklif etilgan. Shavkat Mirziyoyev Trampga javob maktubida O‘zbekistonning tashabbusga tayyor ekanini bildirgan.
Mirziyoyev bu tashabbusni Yaqin Sharqdagi nizolarni bartaraf etish va mintaqada barqarorlikni mustahkamlash yo‘lida muhim qadam sifatida baholagan. Ma’lum qilinishicha, Tinchlik kengashining vazifalari faqat G‘azo sektori bilan cheklanmaydi.
U mojarolar ta’sir ko‘rsatgan hududlarda barqarorlik va ishonchli boshqaruvni tiklashga qaratilgan xalqaro tashkilot sifatida faoliyat yuritishi rejalashtirilgan. Mazkur kengashga Tramp raislik qiladi va muhim qarorlar uning tasdig‘idan o‘tadi.
O‘zbekistonning kengashga asoschi davlat sifatida taklif etilishi mamlakatning xalqaro maydondagi mavqeini yanada mustahkamlashi kutilmoqda. Bu taklif O‘zbekistonning tinchlik va barqarorlikka qaratilgan tashabbuslarda faol ishtirokini ta’minlash uchun yangi imkoniyatlar yaratadi.
Shu tariqa, Toshkent mintaqaviy va global masalalarda o‘z rolini kuchaytirib, yangi bosqichga chiqishi mumkin. Manba: Zamin.uz
