Onlayn kredit olish tartibi qat’iylashtirildi
21-yanvar kuni kredit va to‘lov tashkilotlari, shuningdek, to‘lov tizimi operatorlari tomonidan jismoniy shaxslarga masofadan moliyaviy xizmat ko‘rsatishda axborot xavfsizligi va kiberxavfsizlikni ta’minlash, shuningdek, firibgarlik holatlarining oldini olishga qaratilgan minimal talablarni belgilovchi nizom davlat ro‘yxatidan o‘tkazildi. Bu haqda Zamin.uz xabar berdi.
Ushbu hujjat onlayn kredit ajratish tartibini yanada qat’iylashtirishni ko‘zda tutadi. Nizomga ko‘ra, onlayn kredit olish uchun ariza yuborilganda, kredit tashkiloti avvalo ariza beruvchi ma’lumotlarini tekshiradi.
Bu jarayonda ariza beruvchi kredit bitimini tuzish taqiqlangan shaxslar reyestriga kiritilganmi-yo‘qmi, aniqlanadi. Agar ariza beruvchining ma’lumotlari reyestrda qayd etilmagan bo‘lsa, kreditni rasmiylashtirish jarayoni belgilangan tartibda davom ettiriladi.
Shuningdek, yangi talabga binoan, bir vaqtning o‘zida bir nechta kredit tashkiloti tomonidan bitta JSHSHIR (jismoniy shaxsning shaxsiy identifikatsiya raqami) bo‘yicha so‘rov yuborilgan taqdirda, kredit byurosi faqat birinchi kelib tushgan so‘rovga javob beradi. Agar birinchi so‘rov yuborgan tashkilot mazkur JSHSHIR bo‘yicha kredit rasmiylashtirilganini tasdiqlasa, kredit byurosi boshqa tashkilotlarga shu JSHSHIR bo‘yicha 24 soat davomida so‘rovlarni qabul qilmasligi haqida ma’lumot beradi.
Manba: One.uz
