Kichik biznes uchun 140 trillion so‘m kredit ajratiladi
O‘zbekistonda kichik va o‘rta biznesni qo‘llab-quvvatlash maqsadida joriy yilda 140 trillion so‘m miqdorida kredit ajratilishi rejalashtirilgan. Bu haqda Zamin.uz xabar berdi.
Mazkur kreditlar bo‘yicha tartib qayta ko‘rib chiqilib, hududlarning imkoniyatlari va sharoitlari inobatga olinadi. Bu haqda prezident Shavkat Mirziyoyev 2026 yilda kambag‘allikni qisqartirish va aholi bandligini ta'minlash bo‘yicha ustuvor vazifalarga bag‘ishlangan yig‘ilishda ma'lum qildi.
Davlat rahbari hozirgi kredit berish tizimi barcha hududlar uchun bir xil shartlarni taklif qilayotganini, biroq hududlarning iqtisodiy sharoitlari o‘zaro keskin farq qilishini ta'kidladi. Masalan, Olmazor va Bo‘zatov tumanlarida imkoniyatlar bir xil emas, ammo ikkala hududga ham 17,5 foiz stavkada kredit ajratilmoqda.
Endi esa 37 ta “og‘ir” hududda kreditlar 12 foiz stavkada beriladi. Oilaviy tadbirkorlik dasturi doirasida imtiyozli kreditlarning eng yuqori miqdori 1,5 barobarga oshirilib, barcha hududlar uchun 50 million so‘m qilib belgilandi.
Shuningdek, naslli chorva sotib olish uchun 100 million so‘mgacha, mehmon uylari tashkil etish yoki mahsulotni qayta ishlashga mo‘ljallangan texnologiyalar uchun 150 million so‘mgacha garovsiz kredit ajratiladi. Chegaraoldi va anklav hududlaridagi 562 ta mahallaga esa loyihalar uchun 1 milliard so‘mgacha kredit limiti belgilandi.
Oilaviy tadbirkorlikni rivojlantirish maqsadida dastlab rejalashtirilgan 3,6 trillion so‘mga qo‘shimcha ravishda yana 2 trillion so‘m yo‘naltiriladi. Shuningdek, mahallalar iqtisodiy ixtisoslashuvini chuqurlashtirish uchun banklar tomonidan 17 trillion so‘m kredit ajratilishi ko‘zda tutilgan.
Ushbu kreditlarning mahsulot yetishtirishga sarflangan qismi uchun 4 foiz, qayta ishlash loyihalari uchun esa 6 foiz kompensatsiya ajratiladi. Manba: podrobno.uz
