Toshkentda davlat xaridlari islohoti bo‘yicha seminar o‘tkazildi
Toshkent shahrida Jahon banki tashabbusi bilan davlat xaridlari tizimini isloh qilishga bag‘ishlangan seminar tashkil etildi. Bu haqda Zamin.uz xabar berdi.
Tadbir Jahon bankining Yevropa va Markaziy Osiyo mintaqasida xaridlar yo‘nalishi rahbari Felipe Goya ishtirokida o‘tkazildi. Bu haqda uzdaily.uz xabar berdi.
Seminarda Iqtisodiyot va moliya vazirligi, Investitsiyalar, sanoat va savdo vazirligi vakillari, davlat xaridlari bo‘yicha elektron platformalar operatorlari hamda xalqaro moliya institutlari vakillari ishtirok etishdi. Jumladan, Jahon banki, Osiyo taraqqiyot banki va Islom taraqqiyot banki mutaxassislari o‘z fikr-mulohazalarini bildirishdi.
Tadbir davomida O‘zbekistonda davlat xaridlari tizimini rivojlantirish masalalari muhokama qilindi. Jahon banki tomonidan o‘tkazilgan baholash natijalari taqdim etilib, mavjud islohotlarning holati, mavjud muammolar va ularga yechim bo‘yicha tavsiyalar berildi.
Shuningdek, elektron davlat xaridlari tizimini ayrim sohalarda joriy etish, xalqaro moliya institutlarining bu jarayondagi amaliy ko‘magi va “yashil” davlat xaridlarini kengaytirish masalalariga alohida e’tibor qaratildi. Seminarda davlat xaridlari tizimining shaffofligi va samaradorligini oshirish uchun monitoring mexanizmlari muhokama qilindi.
Tadbir davlat organlari, xalqaro hamkorlar va ekspertlar uchun davlat xaridlarini modernizatsiya qilish va raqamlashtirish bo‘yicha ochiq muloqot maydoniga aylandi.
