O‘zbekiston va Turkiya ta’lim hamkorligi rivojlanmoqda
21-yanvar kuni Anqara shahrida O‘zbekiston tashqi ishlar vaziri maslahatchisi Munira Aminova Turkiyaning Chet eldagi turklar va qardosh jamoalar ishlari boshqarmasi (YTB) rahbari Abdulhadi Turus bilan uchrashuv o‘tkazdi. Bu haqda Zamin.uz xabar berdi.
Bu haqda uzdaily.uz xabar berdi. Uchrashuv davomida ikki davlat o‘rtasidagi ta’lim va madaniy hamkorlik masalalari muhokama qilindi.
Tomonlar hozirgi hamkorlik holatini tahlil qilib, kelgusidagi rejalar yuzasidan fikr almashishdi. Xususan, YTB stipendiya dasturlarining natijalari ko‘rib chiqildi.
Ma’lumotlarga ko‘ra, 2025-yilda ushbu dastur doirasida O‘zbekistonning 228 nafar fuqarosi qabul qilingan bo‘lib, hozirda 136 nafar talaba ta’limni davom ettirmoqda. Umuman olganda, YTB orqali 3 200 nafardan ortiq ishtirokchi o‘qishni muvaffaqiyatli tamomlagan.
Ular bilan aloqalarni mustahkamlash maqsadida maxsus portal ishga tushirilgani qayd etildi. Shuningdek, uchrashuvda “Kultural Turk” ensiklopediyasi, zargarlik yo‘nalishidagi o‘quv dasturlari, shoshilinch tibbiy yordam va boshqa amaldagi loyihalar ko‘rib chiqildi.
Bundan tashqari, axborot texnologiyalari, kiberxavfsizlik, yosh diplomatlar uchun treninglar va farmatsevtika sanoatini rivojlantirishga qaratilgan yangi tashabbuslar muhokama qilindi. Uchrashuv yakunida tomonlar ta’lim va malaka oshirish sohalaridagi hamkorlikni yanada rivojlantirishga tayyor ekanini bildirdi.
Yuqori malakali kadrlar tayyorlash va professional almashinuvlarni kengaytirish bo‘yicha qo‘shma harakatlarning ahamiyati alohida ta’kidlandi.
