O‘zbekiston va Malayziya ziyorat turizmi bo‘yicha hamkorlikni kengaytirmoqda
O‘zbekiston va Malayziya o‘rtasida ziyorat turizmi bo‘yicha hamkorlik kengaymoqda. Bu haqda Zamin.uz xabar berdi.
Yaqinda Kuala-Lumpur shahrida O‘zbekiston elchixonasi tashabbusi bilan “Umra+” dasturini targ‘ib qilishga bag‘ishlangan media-brifing tashkil etildi. Tadbirda O‘zbekiston Ziyorat uyushmasi, “Uzbekistan Airways” aksiyadorlik jamiyati, Malayziyaning MATA, Bumitra va PAPUH turistik uyushmalari vakillari, shuningdek mahalliy turistik kompaniyalar va ommaviy axborot vositalari ishtirok etdi.
Bu haqda uzdaily.uz xabar bermoqda. Uchrashuvda O‘zbekistonda ziyorat turizmini rivojlantirish bo‘yicha amalga oshirilayotgan islohotlar, Malayziya va Indoneziyadan keluvchi ziyoratchilar oqimini 2026–2027 yillarda 100 ming nafarga yetkazish rejalari muhokama qilindi.
Shuningdek, ziyoratchilar uchun yaratilayotgan qulayliklar va ushbu yo‘nalishda faoliyat olib borayotgan turoperatorlarga taqdim etilayotgan imtiyozlar haqida ma’lumot berildi. Brifing davomida Toshkent, Samarqand va Buxoro shaharlarining islomiy sivilizatsiya tarixidagi o‘rni alohida ta’kidlandi.
Prezident tashabbusi bilan tashkil etilgan Islom sivilizatsiyasi markazi va Imom al-Buxoriy majmuasi tadbir ishtirokchilarida katta qiziqish uyg‘otdi. Tadbir doirasida O‘zbekistonning “Umra” ziyorat uyushmasi va Malayziya turistik operatorlar assotsiatsiyasi (MATA) o‘rtasida “Umra+” dasturi bo‘yicha hamkorlik memorandumi imzolandi.
Ushbu memorandum asosida 2026 yil iyun oyida Malayziya va O‘zbekistonda ziyorat turizmi bo‘yicha xalqaro ko‘rgazma o‘tkazilishi rejalashtirilgan. MATA raisi o‘rinbosari Jefri Sulaymon memorandum ikki davlat o‘rtasidagi ziyorat turizmini mustahkamlash uchun muhim asos yaratishini ta’kidladi.
Uning so‘zlariga ko‘ra, 2026 yil 21–23 iyun kunlari Kuala-Lumpur shahrida “Umra+ va ziyorat turizmi” xalqaro ko‘rgazmasi o‘tkaziladi. Malayziyaning yirik turistik kompaniyasi rahbari Abdul Rahim bin Abdulla 2025 yilda O‘zbekistonga bir nechta guruh ziyoratchilarni yuborganini aytib, Malayziya fuqarolarining O‘zbekistonning tarixiy-madaniy merosi va muqaddas qadamjolariga qiziqishi yuqori ekanligini qayd etdi.
U ziyoratchilar uchun yaratilgan infratuzilma va xizmatlarni yuqori baholadi. O‘zbekiston va Malayziya o‘rtasida haftasiga sakkiz marta amalga oshirilayotgan to‘g‘ridan-to‘g‘ri aviaqatnovlar ikki davlat o‘rtasidagi aloqalarni mustahkamlashga xizmat qilmoqda.
Imzolangan memorandum va qo‘shma tashabbuslar O‘zbekistonni xalqaro ziyorat turizmi markaziga aylantirish yo‘lida muhim qadam bo‘lib, Malayziya bilan turistik hamkorlikni yanada rivojlantirish imkonini beradi.
