O‘zbekiston temir yo‘llari keng ko‘lamda yangilanadi
O‘zbekiston temir yo‘l sohasida keng ko‘lamli modernizatsiya ishlari amalga oshirilishi rejalashtirilmoqda. Bu haqda Zamin.uz xabar berdi.
Ushbu loyihalar Prezident farmoni asosida ishlab chiqilgan bo‘lib, ular “Mahalla rivoji va jamiyat farovonligini yuksaltirish yili” dasturi hamda “O‘zbekiston – 2030” strategiyasining bir qismi sifatida belgilangan. Bu haqda uzdaily.uz xabar bermoqda.
“O‘zbekiston temir yo‘llari” aksiyadorlik jamiyati yuk tashish tizimini rivojlantirish maqsadida 1 mingta yangi yuk vagonini ishlab chiqarishni rejalashtirgan. Shuningdek, yo‘lovchi tashish tizimini yangilash uchun 50 ta zamonaviy yo‘lovchi vagonlari tayyorlanadi.
Lokomotivlar parkini yangilash doirasida esa 25 ta dizel va 25 ta gibrid manyovr lokomotivlari xarid qilinadi. Bundan tashqari, yangi yo‘lovchi marshrutlarini ishga tushirish rejalashtirilgan.
Toshkent — Xiva yo‘nalishida yuqori tezlikdagi elektrovoz qatnovi yo‘lga qo‘yiladi. Toshkent — Bekobod yo‘nalishida ham zamonaviy elektrovozlar qatnovi tashkil etiladi.
Ushbu chora-tadbirlar temir yo‘l tarmog‘ining o‘tkazuvchanlik imkoniyatini oshirish, yo‘lovchilar uchun safar vaqtini qisqartirish va yuk tashish samaradorligini oshirishga xizmat qiladi. Bu orqali mamlakat iqtisodiyoti ehtiyojlarini yanada samarali qondirish ko‘zda tutilgan.
