Toshkent-Hovos va Toshkent-Guliston poyezdlari harakati to‘xtatildi
"O‘zbekiston temir yo‘llari" kompaniyasi shahar atrofi elektr poyezdlari harakati jadvalida vaqtinchalik o‘zgarishlar kiritilganini ma’lum qildi. Bu haqda Zamin.uz xabar berdi.
Bu cheklovlar Toshkentdan ikki yo‘nalishga taalluqli bo‘lib, ulardan biri Toshkent–Hovos, ikkinchisi esa Toshkent–Guliston yo‘nalishlari hisoblanadi. 2026-yil 26-yanvardan boshlab Toshkent–Hovos yo‘nalishida harakatlanadigan 6412/6411-sonli elektr poyezd qatnovi to‘liq bekor qilinadi.
Shuningdek, 26-yanvardan 4-fevralgacha, ya’ni 10 kun davomida, Toshkent–Guliston–Toshkent yo‘nalishida qatnovchi 6414/6413-sonli elektr poyezd ham vaqtincha harakatlanmaydi. Kompaniya ushbu o‘zgarishlarning aniq texnik sabablarini oshkor qilmagan.
Yo‘lovchilarga safar rejalari va chipta xaridida ushbu bekor qilinadigan qatnovlarni inobatga olish tavsiya etildi. Shuningdek, yo‘lovchilardan yuzaga kelgan noqulayliklar uchun uzr so‘ralgan.
Manba: podrobno.uz
