O‘zbekiston temiryo‘llari: 1 ming yuk vagoni, 50 yo‘lovchi vagoni qo‘shiladi

O‘zbekiston temiryo‘llari aksiyadorlik jamiyati o‘z parkini keng ko‘lamda modernizatsiya qilishni rejalashtirmoqda. Bu haqda Zamin.uz xabar berdi.

Ushbu chora-tadbirlar Prezident farmoni loyihasida belgilangan bo‘lib, ular “Mahalla rivoji va jamiyat farovonligini yuksaltirish yili” doirasidagi davlat dasturi hamda “O‘zbekiston – 2030” strategiyasida belgilangan ustuvor vazifalar asosida amalga oshiriladi. Bu haqda uzdaily.uz xabar bermoqda.

Rejaga ko‘ra, yuk tashish yo‘nalishidagi harakatlanuvchi tarkibni yangilash uchun 1 mingta yangi yuk vagoni ishlab chiqarilishi ko‘zda tutilgan. Shuningdek, yo‘lovchi tashuvlarini yaxshilash maqsadida 50 ta yangi yo‘lovchi vagoni temiryo‘l parkiga qo‘shiladi.

Lokomotiv xo‘jaligini rivojlantirish doirasida esa 25 ta dizel hamda 25 ta gibrid manyovr lokomotivlari xarid qilinadi. Yangi yo‘lovchi yo‘nalishlarini ishga tushirish ham rejalashtirilgan.

Jumladan, Toshkent – Xiva yo‘nalishida yuqori tezlikda harakatlanuvchi elektropoyezd qatnovi yo‘lga qo‘yiladi. Bundan tashqari, Toshkent – Bekobod yo‘nalishida zamonaviy elektropoyezdlar harakati tashkil etiladi.

Ushbu chora-tadbirlar temiryo‘llarning o‘tkazuvchanligini oshirish, yo‘lovchilarning safar vaqtini qisqartirish va yuk tashish samaradorligini kuchaytirish orqali mamlakat iqtisodiyoti rivojiga xizmat qilishi kutilmoqda.