Tog‘li hududlarda qor ko‘chishi xavfi e’lon qilindi
“O‘zgidromet” xizmati 27–30-yanvar kunlari kutilayotgan yog‘ingarchilik va havo haroratidagi keskin o‘zgarishlar sababli mamlakatning bir qator tog‘li hududlarida qor ko‘chishi xavfi mavjudligi haqida ogohlantirdi. Bu haqda Zamin.uz xabar berdi.
Mutaxassislarning ta’kidlashicha, ushbu kunlarda xavf yuqori bo‘lgan hududlarda ehtiyot choralarini kuchaytirish zarur. Qashqadaryo viloyatida Dehqonobod, Kitob, Qamashi va Shahrisabz tumanlarida, Surxondaryo viloyatida Boysun, Qumqo‘rg‘on, Sariosiyo va Uzun tumanlarida, Samarqand viloyatida Nurobod, Qo‘shrabot, Samarqand va Urgut tumanlarida, Jizzax viloyatida Baxmal va Zomin tumanlarida, Toshkent viloyatida Bo‘stonliq, Parkent va Ohangaron tumanlari, jumladan Chotqol tizmasi hududlarida, shuningdek, Namangan viloyatining Pop tumanida qor ko‘chishi xavfi mavjud.
Sinoptiklar tog‘li hududlarda yashovchi aholiga, dam oluvchilarga va ushbu yo‘nalishlarda harakatlanayotgan haydovchilarga alohida ogoh bo‘lishni, zaruratsiz safarlardan tiyilishni va xavfsizlik qoidalariga qat’iy rioya qilishni tavsiya etmoqda. Ma’lumotlarga ko‘ra, ob-havodagi beqarorlik hali davom etishi mumkin.
Shu bois rasmiy ogohlantirishlarni inobatga olish muhim ahamiyatga ega. Manba: zamin.uz
