O‘zbekiston YAIM 2025 yilda 7,7 foizga o‘sdi
2025 yil yakunlariga ko‘ra, O‘zbekiston iqtisodiyoti 7,7 foizga o‘sdi va yalpi ichki mahsulot (YAIM) hajmi joriy narxlarda 1,85 kvadrillion so‘mga yetdi. Bu haqda Zamin.uz xabar berdi.
Bu ko‘rsatkich 2024 yilga nisbatan sezilarli o‘sishni anglatadi. Statistika agentligi ma’lumotlariga ko‘ra, YAIMning real o‘sishi 7,7 foizni tashkil etdi.
Ushbu iqtisodiy o‘sish asosan asosiy tarmoqlarning ijobiy dinamikasi hisobiga ta’minlangan. Hisobot davrida xizmatlar sohasi YAIMning 48,6 foizini tashkil etib, ushbu tarmoqning ulushi avvalgi yilga nisbatan 0,4 foizga oshdi.
Sanoatning ulushi 26,8 foizga yetdi, qurilish esa 7,3 foizni tashkil etdi. Qishloq, o‘rmon va baliqchilik xo‘jaligining ulushi esa 17,3 foizga tushdi.
Sanoatdagi o‘sish, asosan, qayta ishlash tarmog‘i hisobiga ta’minlanib, bu yo‘nalishda qo‘shilgan qiymat 7,7 foizga oshdi. Qurilish sektorida bajarilgan ishlar hajmi 14 foizga o‘sdi.
Xususan, bino va inshootlar qurilishi 7,4 foizga, fuqarolik obyektlari qurilishi 30,8 foizga, ixtisoslashgan qurilish ishlari esa 38,4 foizga ko‘paydi. Xizmatlar sohasida esa 8,5 foizlik o‘sish qayd etildi.
Eng tez rivojlangan yo‘nalishlar axborot va aloqa xizmatlari (23,9 foiz), savdo (13,6 foiz) va yashash hamda ovqatlanish xizmatlari (10,4 foiz) bo‘ldi. Savdo tarmog‘ida asosiy ulush avtotransport vositalarisiz chakana savdoga to‘g‘ri kelib, bu ko‘rsatkich 54,7 foizni tashkil etdi.
Tashish va saqlash tarmog‘ining YAIMdagi ulushi 5,5 foiz bo‘lib, bu sohada avtomobil transporti yetakchilik qilmoqda. Avtomobil transportining ulushi 56,4 foizni tashkil etdi, undan keyin quvur transporti (10,1 foiz) va temir yo‘l (7,3 foiz) joy oldi.
2025 yilda jon boshiga YAIM 48,8 million so‘mni tashkil etdi, bu esa 2024 yilga nisbatan 5,7 foizlik real o‘sishni anglatadi. Axborot-kommunikatsiya texnologiyalari (AKT) xizmatlarining iqtisodiyotdagi ulushi 2,7 foizni tashkil etdi.
Ushbu tarmoqda aloqa xizmatlari, kompyuter dasturlash va bog‘liq xizmatlar yetakchi bo‘ldi. Kichik tadbirkorlik subyektlari tomonidan 923,5 trillion so‘mlik yalpi qo‘shilgan qiymat yaratilgan bo‘lib, bu umumiy iqtisodiyotning 52,2 foizini tashkil etdi.
Kichik biznesning qishloq xo‘jaligi, xizmatlar, sanoat va qurilish tarmoqlaridagi hissasi sezilarli o‘rin tutdi. Shu bilan birga, kuzatilmaydigan iqtisodiyot YAIMning 26,9 foizini tashkil etib, bu ko‘rsatkichda uy xo‘jaliklari va yashirin sektorning ulushi yuqori bo‘ldi.
Manba: uzdaily.uz.
