Xiva va Urganch o‘rtasida yangi pullik yo‘l quriladi

Xorazm viloyatida Xiva va Urganch shaharlarini bog‘laydigan yangi pullik avtomobil yo‘li qurilishi rejalashtirilmoqda. Bu haqda Zamin.uz xabar berdi.

Ushbu loyiha doirasida 49 kilometr uzunlikdagi avtomagistral barpo etiladi. Xiva shahar hokimligi matbuot xizmatining ma’lum qilishicha, loyiha hudud transport tizimini yaxshilash va xalqaro standartlarga mos zamonaviy yo‘l infratuzilmasini yaratishga qaratilgan.

Yangi yo‘l amaldagi Xiva shossesiga (D215) muqobil bo‘lib, Elobod va Nurli Hayot ko‘chalari kesishmasidan boshlanadi va Urganch xalqaro aeroportigacha yetib boradi. Trassa viloyat markazini janub va sharq tomondan aylanib o‘tishi rejalashtirilgan.

Bu yo‘l avtomobil harakatini yengillashtirishi, shaharlar orasidagi yo‘l vaqtini qisqartirishi, transport xavfsizligini oshirishi va yuk hamda yo‘lovchi tashish jarayonini tezlashtirishi kutilmoqda. Shuningdek, loyiha Xorazm viloyatining investitsion jozibadorligini oshirishga xizmat qilishi aytilmoqda.

Ushbu tashabbus 14-yanvar kuni turizm, transport va ijtimoiy infratuzilmani rivojlantirish masalalariga bag‘ishlangan yig‘ilishda Prezident Shavkat Mirziyoyevga taqdim etilgan. Mazkur yig‘ilishda Urganchdagi temiryo‘l vokzali bilan aeroportni bog‘laydigan yangi temiryo‘l tarmog‘ini qurish masalasi ham muhokama qilingan.

Ma’lumot uzdaily.uz saytidan olindi.