Haj va Umra uchun yagona portal ishga tushdi
Haj va Umra ziyoratlarini tashkil etish tartibida yangi o‘zgarishlar joriy etildi. Bu haqda Zamin.uz xabar berdi.
Endilikda ushbu ziyoratlarga borish istagida bo‘lgan fuqarolar uchun yagona elektron portal orqali ro‘yxatdan o‘tish majburiy bo‘ldi. Bu haqda Vazirlar Mahkamasining 2026 yil 24 yanvarda qabul qilingan 27-sonli qarorida ma’lum qilingan.
Ushbu hujjatga ko‘ra, “Haj va Umra yagona portali” ishga tushirilgan bo‘lib, bu tizim ziyorat jarayonlarini tartibga solish va shaffoflikni ta’minlashga qaratilgan. Qarorga muvofiq, yangi tartib Haj ziyorati uchun 2026 yil 1 fevraldan, Umra ziyorati uchun esa 2026 yil 1 maydan kuchga kiradi.
Shu sababli, ziyoratga borishni rejalashtirayotgan fuqarolar avval ushbu portal orqali ro‘yxatdan o‘tib, zarur ma’lumotlarni taqdim etishlari shart bo‘ladi. E’tiborga molik jihati shundaki, ziyoratchilar haqidagi ma’lumotlar portalga kiritilmaguncha, safarlarni tashkil etishga ruxsat berilmaydi.
Mazkur yangilik ziyorat jarayonlarini tizimli ravishda boshqarish va tartibni mustahkamlashga xizmat qiladi. Shu bilan birga, ushbu portal orqali fuqarolarga qulaylik yaratish va ortiqcha byurokratik to‘siqlarni kamaytirish maqsad qilingan.
Manba: one.uz.
