Fevral oyida iliq kunlar va sovuq qaytishi kutilmoqda
Fevral oyida ob-havo qanday bo‘lishi haqida O‘zgidromet ma’lumotlariga ko‘ra, ushbu oy yanvarga nisbatan biroz iliqroq o‘tishi kutilmoqda. Bu haqda Zamin.uz xabar berdi.
Xususan, tekislik hududlarida harorat o‘rtacha 2–3 darajaga, tog‘li hududlarda esa 1–1,5 darajaga yuqoriroq bo‘lishi mumkin. Shunga qaramay, qish ob-havosi har doim bir xil o‘tmaydi.
Ba’zi yillarda fevral oyida bahoriy iliqlik kuzatiladi va bu vaqt bodom, o‘rik, olxo‘ri kabi daraxtlarning erta gullashiga sabab bo‘ladi. Ko‘p yillik kuzatuvlar shuni ko‘rsatadiki, fevral oyida maksimal harorat ayrim yillarda 24–29 darajagacha, janubiy hududlarda esa hatto 30–32 darajagacha ko‘tarilgan.
Masalan, 2016 va 2021 yillarda haroratning rekord darajada yuqori bo‘lgani qayd etilgan. Ushbu yillarda fevral oyi o‘rtacha me’yordan 3–6 darajaga iliqroq kechgan.
Eng issiq kunlarda harorat 22–27 darajagacha, janubda esa 28–30 darajagacha yetgan. Shunga qaramay, fevral oyida iliqlik uzoq davom etmaydi.
Ba’zan tez iligan ob-havo ortidan sovuq qaytishi kuzatiladi. Masalan, 2021 yil fevral oxirida harorat keskin pasayib, 10–15 daraja sovuqqacha yetgan.
Eng sovuq fevral sifatida esa 2014 yil qayd etilgan bo‘lib, bu yil o‘rtacha harorat me’yordan 4–8 darajaga past bo‘lgan. Shu sababli, fevral oyi qish faslining o‘ziga xos xususiyatlarini saqlab qoladi.
Ma’lumot manbasi: O‘zgidromet.
