Prezident yig‘ilishida 4-sinf o‘quvchisiga avtomobil sovg‘a qilindi
24-fevral kuni Prezident Shavkat Mirziyoyev rahbarligida bo‘lib o‘tgan yig‘ilishda kutilmagan, ammo yoqimli bir voqea yuz berdi. Bu haqda Zamin.uz xabar berdi.
Yig‘ilishda ishtirok etgan 4-sinf o‘quvchisi Otamurod Komiljon Otaniyozovning qo‘shig‘ini kuylab berdi. Ushbu iqtidorli bolaning chiqishi yig‘ilganlarda iliq taassurot qoldirdi.
Davlat rahbari esa hazilomuz ravishda “Otajon Xudoyshukurov repertuaridan ham bo‘lsin”, deya kulib, o‘quvchini rag‘batlantirdi. Shundan so‘ng Prezident unga avtomobil sovg‘a qilinishini e’lon qildi.
Bu haqda jurnalist Aziza Qurbaniyova ma’lum qildi. Yig‘ilishning asosiy mavzusi yoshlar bandligini ta’minlash bo‘ldi.
Ma’lumotlarga ko‘ra, har yili 600 ming nafar yosh mehnat bozoriga kirib kelmoqda. 2030-yilga kelib bu raqam 1 millionga yetishi mumkin.
Prezident yoshlarning o‘z qobiliyatlarini namoyon qilishi va o‘zlariga mos ish topishi uchun barcha sharoitlarni yaratish muhimligini ta’kidladi. O‘tgan yili yoshlar bandligini ta’minlash uchun banklar va Yoshlar ishlari agentligiga 400 million dollar ajratilgan.
Bu mablag‘lar doirasida “Yoshlar biznesi” va “Kelajakka qadam” dasturlari amalga oshirilib, 15 ming nafar yosh o‘z ishini boshlagan. Natijada 50 ming nafardan ortiq odam ish bilan ta’minlangan.
Shuningdek, yoshlar tadbirkorligini qo‘llab-quvvatlash uchun qo‘shimcha 200 million dollar ajratilishi rejalashtirilmoqda. Yosh tadbirkorlar uchun kredit miqdori hozirgi 5 milliard so‘mdan 10 milliard so‘mgacha oshirilishi, innovatsion startap loyihalariga esa 100 ming dollargacha investitsiya kiritish imkoniyati yaratilishi e’lon qilindi.
Yig‘ilish davomida ko‘plab muhim qarorlar qabul qilindi. Ammo ko‘pchilikning yodida qolgan voqea — qo‘shiq kuylagan bolaning qalbiga quvonch solgan sovg‘a bo‘ldi.
