Prezident yig‘ilishida 4-sinf o‘quvchisiga avtomobil sovg‘a qilindi
24-fevral kuni O‘zbekiston Prezidenti Shavkat Mirziyoyev boshchiligida o‘tgan yig‘ilishda kutilmagan, ammo yoqimli voqea sodir bo‘ldi. Bu haqda Zamin.uz xabar berdi.
Yig‘ilishda qatnashgan 4-sinf o‘quvchisi qo‘shiq kuylab bergach, unga avtomobil sovg‘a qilinishi ma’lum qilindi. Bu haqda jurnalist Aziza Qurbomova xabar berdi.
Ma’lum bo‘lishicha, Otamurod ismli bola Komiljon Otaniyozovning qo‘shig‘ini kuylashini aytgan. Prezident esa hazil aralash “Otajon Xudoyshukurov repertuaridan ham bo‘lsin”, deb kulgi uyg‘otgan.
Suhbatdan so‘ng davlat rahbari o‘quvchiga mashina sovg‘a qilinishini bildirgan. Yig‘ilishda asosiy mavzu yoshlar bandligi edi.
Har yili 600 ming yosh mehnat bozoriga kirib kelayotgani, 2030-yilga borib bu ko‘rsatkich 1 millionga yetishi mumkinligi ta’kidlandi. Prezident yoshlar uchun mos ish o‘rinlari yaratish eng dolzarb masala ekanini qayd etdi.
Shuningdek, o‘tkazilgan so‘rov natijalariga ko‘ra, yoshlarning uchdan biri tadbirkor bo‘lish istagini bildirgan. O‘tgan yili yoshlar bandligini ta’minlash uchun banklar va Yoshlar ishlari agentligiga 400 million dollar ajratilgan edi.
“Yoshlar biznesi” va “Kelajakka qadam” dasturlari orqali 15 ming nafar yosh o‘z ishini boshladi, natijada 50 ming odam ish bilan ta’minlandi. Yig‘ilishda yana bir muhim yangilik ham e’lon qilindi: yoshlar tadbirkorligini qo‘llab-quvvatlash uchun qo‘shimcha 200 million dollar ajratilishi rejalashtirilmoqda.
Bundan tashqari, yosh tadbirkorlar loyihalariga 10 milliard so‘mgacha kredit berish va innovatsion startap loyihalariga 100 ming dollargacha investitsiya kiritishga ruxsat berilishi ma’lum qilindi. Yig‘ilishda ko‘plab muhim raqamlar va qarorlar e’lon qilindi, lekin ko‘pchilikning yodida qolgani — qo‘shiq aytgan bolaning qalbiga quvonch solgan o‘sha sovg‘a bo‘ldi.
