Shavkat Mirziyoyev va Chexiya Bosh vaziri hamkorlikni rivojlantirishni kelishib oldi
Koʻksaroy qarorgohida Oʻzbekiston Respublikasi Prezidenti Shavkat Mirziyoyev va Chexiya Respublikasi Bosh vaziri oʻrtasida boʻlib oʻtgan uchrashuv ikki davlat munosabatlarida yangi davrni boshlab berdi. Bu haqda Zamin.uz xabar berdi.
Tor va kengaytirilgan tarkibda oʻtkazilgan muzokaralar davomida tomonlar oʻzaro manfaatli hamkorlikni sifat jihatidan mutlaqo yangi bosqichga olib chiqish masalalarini atroflicha koʻrib chiqdilar. Ushbu tashrif doirasida erishilgan kelishuvlar hamda istiqbolli rejalar mamlakatlarimiz iqtisodiyoti va ijtimoiy hayoti uchun gʻoyat muhim ahamiyatga ega.
Muzokaralar markazida savdo-iqtisodiy aloqalarni yanada jadallashtirish masalasi turdi. Soʻnggi yillarda ikki mamlakat oʻrtasidagi tovar ayirboshlash hajmi qariyb ikki barobarga ortgani quvonarli holatdir.
Bugungi kunda yurtimizda Chexiya sarmoyasi ishtirokida oʻttizdan ortiq korxona muvaffaqiyatli faoliyat yuritmoqda. Kelgusida mahsulot turlarini koʻpaytirish orqali oʻzaro savdo aylanmasini bir milliard dollarga yetkazish ustuvor vazifa sifatida belgilandi.
Shuningdek, Chexiya Eksport banki va tegishli sugʻurta agentliklari Oʻzbekistondagi yirik loyihalarni moliyaviy jihatdan qoʻllab-quvvatlashga tayyor ekanini bildirdi. Innovatsiya va texnologik hamkorlik yoʻnalishida ham katta qadamlar tashlanmoqda.
Tomonlar iqtisodiyotning yuqori texnologiyali tarmoqlarida qoʻshma loyihalarni amalga oshirishga kelishib oldilar. Buning uchun maxsus texnologik hamkorlik dasturi ishlab chiqiladi.
Mashinasozlik, yashil energiya, geologiya, kimyo va farmatsevtika sohalaridagi tashabbuslar har tomonlama qoʻllab-quvvatlanadi. Ayniqsa, Chexiyada Oʻzbekistonning ilk sertifikatlash filiali ochilishi hamda yurtimizda zamonaviy laboratoriyalar barpo etilishi mahsulotlarimizning jahon bozoridagi raqobatbardoshligini oshirishga xizmat qiladi.
Ijtimoiy va madaniy aloqalarni rivojlantirish ham diqqat markazida boʻldi. Oliy taʼlim muassasalari oʻrtasida qoʻshma diplom dasturlari va talabalar almashinuvini kengaytirishga kelishildi.
Toshkent va Praga shaharlari oʻrtasida toʻgʻridan-toʻgʻri aviaqatnovlarni qayta tiklash imkoniyatlari oʻrganilmoqda. Shu bilan birga, tartibli mehnat migratsiyasi sohasida xavfsiz va tizimli hamkorlikni yoʻlga qoʻyish choralari koʻriladi.
Kelgusida iqtisodiy munosabatlarni tizimli boshqarish maqsadida Ishbilarmonlar kengashi tuziladi. Hukumatlararo komissiyaning navbatdagi majlisida barcha kelishuvlarni oʻz ichiga olgan qoʻshma chora-tadbirlar rejasi tasdiqlanishi kutilmoqda.
Bu kabi amaliy qadamlar Oʻzbekiston va Chexiya oʻrtasidagi doʻstlik rishtalarini yanada mustahkamlashga xizmat qiladi.
