O‘zbekiston kartoshka yetishtirish sohasida Misrning tajribasidan foydalanishni yo‘lga qo‘yadi. Bu haqida Zamin.uz xabar berdi.
Nova24.uz saytining xabar berishicha, EastFruit ma’lumotlariga ko‘ra, urug‘lik kartoshka yetishtirish bo‘yicha hamkorlik memorandumi imzolangan. Ushbu hujjat Misrning EFC Plants kompaniyasi hamda O‘zbekistonning “Agro Gold Premium” kompaniyasi tomonidan Qohirada o‘tkazilgan qishloq xo‘jaligi biznes-forumi doirasida rasmiylashtirilgan.
Forumda Qashqadaryo viloyatidan tadbirkorlar va Misrning yetakchi agroindustriya kompaniyalari vakillari ishtirok etdi. Unda O‘zbekiston delegatsiyasi Misrning qishloq xo‘jaligi, xususan, kartoshka va qand lavlagi yetishtirish sohasidagi ilg‘or tajribalari bilan tanishdi.
Ushbu tajribalar O‘zbekistonda yuqori sifatli urug‘lik kartoshka ishlab chiqarishni rivojlantirish hamda agrar sohada investitsiyalarni jalb qilishda qo‘llaniladi. Forum davomida tomonlar kartoshkachilik va qand sanoati bo‘yicha o‘zaro tajriba almashdilar va O‘zbekiston agrar sohasiga sarmoya kiritish istiqbollarini muhokama qilishdi.
Kelgusida urug‘lik kartoshka ishlab chiqarishning barcha bosqichlarini O‘zbekistonda mahalliylashtirish loyihasi amalga oshirilishi rejalashtirilgan. Bu loyiha mamlakatimizning qishloq xo‘jaligi tarmog‘ini yanada mustahkamlashga xizmat qiladi.
