PSJ jarohatlar sabab terma jamoaga norozilik bildirdi
Fransiya terma jamoasi bazasida «PSJ» hujumchilari Usmon Dembele va Dezire Dyue jarohat oldi. Bu haqida Euro-football.ru xabar berdi.
Matbuotda parijliklar juda g‘azabda ekani haqida xabarlar tarqaldi, chunki ular milliy jamoani futbolchilarning sog‘lig‘i bilan bog‘liq muammolar haqida oldindan ogohlantirgan edi. Endi «PSJ» ushbu masala yuzasidan rasmiy bayonot berdi.
Bayonotda aytilishicha, «PSJ» Fransiya terma jamoasi mashg‘ulotlari boshlanishidan oldin futbolchilarning jismoniy yuklamalari va jarohat olish xavfi haqida aniq tibbiy ma’lumotlarni federatsiyaga taqdim etgan. Klub Fransiya terma jamoasining tibbiy shtabi ushbu tavsiyalarni inobatga olmagani va tibbiy shtablar o‘rtasida hech qanday maslahatlashuv bo‘lmagani uchun afsusda ekanligini bildiradi.
Shuningdek, «PSJ» futbolchilarning sog‘lig‘i ustuvor bo‘lishi uchun klublar va terma jamoa o‘rtasida shaffof hamkorlikni ta’minlaydigan protokolni tezda ishlab chiqishni taklif qilmoqda. Bu choralar jarohatlarning oldini olish va futbolchilarning sog‘lig‘ini himoya qilishda muhim ahamiyatga ega bo‘ladi.
