Barselona joriy mavsum uy o‘yinlarini boshqa stadionda o‘tkazadi

«Barselona» rasmiy saytida muhim bayonot e’lon qilindi. Bu haqida Euro-football.ru xabar berdi.

Unda ta’kidlanishicha, «Kamp Nou» stadionining rekonstruksiya ishlari hali yakunlanmagan va u hozirda rasmiy o‘yinlarni qabul qilishga tayyor emas. Shu sababli, joriy mavsumdagi birinchi uy o‘yini Johan Kroyf nomidagi stadionda o‘tkaziladi.

Ushbu stadionda atigi olti ming tomoshabin sig‘ishi mumkin. «Barselona» jamoasi 14 sentyabr, yakshanba kuni «Valensiya» jamoasiga qarshi maydonga tushadi.

«Barselona» klubi yaqin kelajakda «Kamp Nou» stadionini ochish uchun zarur bo‘lgan ma’muriy ruxsatnomalarni olish ustida faol ish olib bormoqda. Joriy mavsumda Ispaniya La Ligasi doirasida o‘tkazilgan uchta turda «Barselona» yetti ochko to‘pladi.

Klubning maqsadi stadionni imkon qadar tezroq tayyorlab, muxlislar oldida o‘z o‘yinlarini o‘tkazishni boshlashdir. Hozircha esa jamoa yangi uy stadionida o‘yinlarini davom ettiradi.