Saudiya klublari Ryudigerni diqqat bilan kuzatmoqda

Madridning «Real» jamoasining markaziy himoyachisi Antonio Ryudiger Saudiya Arabistonining chempionatidagi klublarning transfer maqsadlaridan biri bo‘lib qolmoqda. Bu haqida Euro-football.ru xabar berdi.

So‘nggi paytlarda nemis futbolchining jamoani tark etishi haqida mish-mishlar ko‘paymoqda. 32 yoshli o‘yinchi Xavi Alonso boshchiligida asosiy tarkibda doimiy o‘rin egallamayapti.

Yaqinda esa u jiddiy jarohat oldi va taxminlarga ko‘ra, u dekabr oyigacha maydondan chetlanadi. Jurnalist Fabrizio Romano ma’lumotlariga ko‘ra, Saudiya klublari Ryudigerga katta qiziqish bildirmoqda va uni bir necha yildan beri kuzatib kelmoqda.

Yanvardan boshlab Antonio Ryudiger yangi jamoalar bilan erkin muzokaralar olib borishi mumkin bo‘ladi. Hozirda esa futbolchi to‘liq e’tiborini «Real»ga qaratgan.