«Real» FIFAga hakamlik bo‘yicha shikoyat qiladi
«Real» jamoasi Ispaniya chempionatidagi hakamlikka nisbatan shikoyat bilan Xalqaro futbol federatsiyasiga (FIFA) murojaat qilmoqchi. Bu haqida Euro-football.ru xabar berdi.
Bu haqda klubning rasmiy televizion kanali xabar berdi. Shikoyatda ispan futbolidagi bahsli hakamlik holatlari batafsil bayon etiladi.
Ushbu holatlar joriy va o‘tgan mavsumdagi o‘yinlardan misollar bilan keltiriladi. «Real» ushbu masalani jamoa himoyachisi Din Xoysenning La Liga to‘rtinchi turidagi «Real Sosyedad»ga qarshi o‘yinda qizil kartochka olib maydonni tark etishi sababli ko‘targan.
U birinchi bo‘limda maydondan haydalgan. Xabi Alonso shogirdlari o‘shanda o‘n nafarga kamayib, 2:1 hisobida g‘alaba qozongan.
Hozirgi vaqtda «Real» 12 ochko jamg‘arib, Ispaniya chempionatida peshqadamlik qilmoqda. Jamoa rahbariyati hakamlikdagi noaniqliklarni hal qilish va futbolning adolatli o‘yin tamoyillarini ta’minlash maqsadida FIFAga rasmiy murojaat yuborishni rejalashtirmoqda.
