Maykl Kerrik "Yunayted"da yangi davrni boshlab berdi
"Liverpul"ning sobiq himoyachisi Jeymi Karrager Maykl Kerrikning "Manchester Yunayted"da qisqa vaqt ichida ko‘rsatgan faoliyatini yuqori baholadi. Bu haqda Zamin.uz xabar berdi.
Unga ko‘ra, yangi murabbiy qo‘l ostida jamoa maydonda mutlaqo yangi ruh va xarakter namoyish etmoqda. Maykl Kerrik boshchiligida "Yunayted" dastlabki ikki o‘yinda futbol olamini hayratda qoldirdi.
Avvaliga Manchester derbisida "Manchester Siti"ni 2:0 hisobida mag‘lub etgan jamoa, oradan ko‘p o‘tmay, APLning markaziy bahsida Londonda "Arsenal" ustidan 3:2 hisobida dramatik g‘alaba qozondi. Bu natijalar jamoada nafaqat taktik, balki psixologik o‘zgarishlar ham yuz berganini ko‘rsatdi.
Karrager aynan ushbu o‘zgarishlarga alohida e’tibor qaratdi. U Kerrikning jamoaga jasorat va ishonch olib kelganini ta’kidladi.
"Rostini aytganda, bu sifatlar oldingi murabbiy Ruben Amorimda yetishmasdi. Amorimda bunday qat’iyat va jasorat sezilmas edi", dedi Karrager "Arsenal" ustidan qozonilgan g‘alabani sharhlar ekan.
Eslatib o‘tish joiz, "Manchester Yunayted" rahbariyati 5-yanvar kuni Ruben Amorim bilan shartnomani bekor qilgan edi. Oradan sakkiz kun o‘tib, klub afsonasi hisoblangan Maykl Kerrik vaqtinchalik bosh murabbiy etib tayinlandi.
Unga mavsum yakuniga qadar jamoani boshqarish vazifasi yuklatildi. Qisqa vaqt ichida qo‘lga kiritilgan ushbu ikki g‘alaba Kerrikka bo‘lgan ishonchni sezilarli darajada oshirdi.
Muxlislar jamoani yana jasoratli va oxirigacha kurashadigan holatda ko‘rmoqda. Albatta, oldinda hali ko‘plab sinovlar bor, ammo bu boshlanishning o‘ziyoq "Yunayted"da yangi sahifa ochilganidan darak bermoqda.
