«Manchester Yunayted» safarda «Arsenal»ni mag‘lub etdi
Angliya Premer-ligasining 23-turida Londonda kutilgan katta to‘qnashuv o‘ta qiziqarli va dramatik tarzda o‘tdi. Bu haqda Zamin.uz xabar berdi.
«Manchester Yunayted» safarda «Arsenal»ni 3:2 hisobida mag‘lub etib, muhim uch ochkoni qo‘lga kiritdi. Uchrashuvning hal qiluvchi lahzasi 87-daqiqada Mateus Kunyaning goli bilan belgilandi.
O‘yindan so‘ng «Manchester Yunayted» bosh murabbiyi Maykl Kerrik jamoaning mehnati va xarakterini yuqori baholab, futbolchilarining o‘yinda ko‘rsatgan fidoyiligidan mamnun ekanini ta’kidladi. Uning so‘zlariga ko‘ra, bu uchrashuv jamoa uchun juda og‘ir kechgan.
Bunga raqibning bosimi, o‘yindagi yuqori shiddat va har bir vaziyatda maksimal diqqat talab qilinishi sabab bo‘lgan. Kerrik bu safar g‘alaba uchun jamoa avvalgi o‘yinlarga nisbatan ko‘proq kuch va sabr sarflaganini alohida qayd etdi.
«Yigitlar g‘alaba uchun katta kuch sarfladi. Men ular bilan faxrlanaman.
Bugungi o‘yin o‘tgan haftadagidan ancha qiyin bo‘ldi. O‘tgan hafta o‘z ritmimizda o‘ynagan bo‘lsak, bu safar muvaffaqiyatga erishish uchun ko‘proq harakat qilishga to‘g‘ri keldi», — dedi Kerrik.
Ma’lumot uchun, 17-yanvar kuni «Manchester Yunayted» o‘z maydonida «Manchester Siti»ni 2:0 hisobida mag‘lub etgan edi. Ushbu safar esa «Arsenal» ustidan qo‘lga kiritilgan g‘alaba jamoa uchun yana bir katta psixologik turtki bo‘lib xizmat qildi.
Shu tariqa, «Manchester Yunayted» ketma-ket ikki kuchli raqib bilan o‘yinlardan muvaffaqiyatli o‘tdi. Eng muhimi, jamoa nafaqat natija, balki xarakter, iroda va so‘nggi daqiqalarda ham kurashni davom ettirish qobiliyati bilan muxlislarni xursand qilmoqda.
Mazkur g‘alabalar jamoaning chempionatdagi pozitsiyasini mustahkamlashda muhim ahamiyat kasb etmoqda.
