Gvardiola: "Galatasaroy"ga qarshi o‘yinda yo‘qotishlar ko‘p
UEFA Chempionlar Ligasi guruh bosqichining so‘nggi tur o‘yinlari oldidan «Manchester Siti» bosh murabbiyi Xosep Gvardiola jamoaning holati haqida ma’lumot berdi. Bu haqda Zamin.uz xabar berdi.
U ayniqsa, "Galatasaroy"ga qarshi o‘yinda asosiy tarkibdagi bir qancha futbolchilar maydonga tusha olmasligini ochiq aytdi. Murabbiyga ko‘ra, jarohatlar va boshqa sabablarga ko‘ra bir qator futbolchilar jamoaga yordam bera olmaydi.
Gvardiola bu o‘yinda qatnashmaydigan futbolchilar ro‘yxatini ham e’lon qildi. Unga ko‘ra, Mark Gexi, Antuan Semeno, Rodri, Niko Gonsales, Savio va Jon Stounz safdan chiqqan.
Murabbiy bu futbolchilarning turli sabablarga ko‘ra o‘yinga tayyor emasligini ta’kidlab, muxlislarni vaziyatni to‘g‘ri qabul qilishga chaqirdi. Shuningdek, ispaniyalik mutaxassis stadiondagi muxlislarning qo‘llab-quvvatlashi muhim ahamiyatga ega ekanini alohida ta’kidladi.
Gvardiola fikricha, "Etixad" stadionidagi muxlislar jamoani 1/8 finalga chiqish yo‘lida qo‘shimcha ruhlantiruvchi kuchga aylanishi mumkin. Murabbiy bu uchrashuvda nafaqat futbolchilar, balki muxlislarning ham faol ishtiroki zarurligini aytib o‘tdi.
Ma’lumot uchun, «Manchester Siti» va «Galatasaroy» jamoalari o‘rtasidagi o‘yin 28-yanvar kuni Manchester shahridagi «Etixad» stadionida bo‘lib o‘tadi. Bu hal qiluvchi bahsda «Manchester Siti» uchun muxlislarning qo‘llab-quvvatlashi juda muhim bo‘lishi kutilmoqda.
Manba: zamin.uz.
