Linkoln Mourinyoni hurmatsizlikda aybladi
“Fenerbahche” klubining sobiq futbolchisi Linkoln portugaliyalik mashhur murabbiy Joze Mourinyo haqida o‘z fikrlarini bildirdi. Bu haqda Zamin.uz xabar berdi.
Euro-football.ru xabariga ko‘ra, futbolchi Mourinyoni va’dasiga sodiq qolmaslikda va hurmatsizlikda ayblagan. Linkolnning so‘zlariga ko‘ra, u “Hall Siti” klubida ijara asosida o‘ynashdan oldin Mourinyo bilan suhbatlashgan va murabbiy uni mavsumdan keyin Portugaliyadagi yig‘inlarda ko‘rishni istashini aytgan.
Ammo mavsum yakunlangach, futbolchi murabbiyning chaqiruvini kutgan bo‘lsa-da, u bilan bog‘lanish urinishlari natijasiz qolgan. Hatto tarjimon orqali aloqaga chiqishga urinib ko‘rganida ham Mourinyo suhbatdan bosh tortgan va sport direktori bilan muloqot qilishni taklif qilgan.
Futbolchi shuningdek, jamoa Portugaliyada bo‘lganida, o‘zi ham shu mamlakatda bo‘lganini, biroq Mourinyo uni Istanbulga qaytib, alohida shug‘ullanishga majbur qilganini aytdi. Linkolnning ta’kidlashicha, unga nisbatan adolatsiz va hurmatsiz munosabat ko‘rsatilgan.
U o‘zini jamoaga har tomonlama yordam berishga intilganini, hatto o‘z pozitsiyasidan tashqarida o‘ynashga ham rozi bo‘lganini aytdi. Og‘ir jarohat olganida esa, klub tomonidan yetarlicha qo‘llab-quvvatlanmaganini bildirdi.
“Men maydonda doim bor kuchim bilan ishlaganman, lekin mashhur futbolchilar kabi e’tibor qozonolmadim. Shunga qaramay, o‘z vazifamni bajarishga harakat qildim”, — dedi futbolchi.
Ayni paytda Joze Mourinyo “Benfika” klubini boshqarayotgani ma’lum qilindi.
