2030 yilgi mundial finali Ispaniyada o‘tkazilishi mumkin
2030 yilgi futbol bo‘yicha jahon chempionati finali Ispaniyada o‘tkazilishi mumkin. Bu haqda Zamin.uz xabar berdi.
BBC xabariga ko‘ra, bu haqda Ispaniya futbol federatsiyasi prezidenti Rafael Lusan ma’lum qilgan. Ushbu ma’lumotni euro-football.ru ham tasdiqlagan.
Turnirni Ispaniya, Portugaliya va Marokash birgalikda tashkil etadi. Shu bilan birga, mundialning 100 yillik yubileyi munosabati bilan ilk uchta o‘yin Janubiy Amerikadagi Urugvay, Argentina va Paragvayda o‘tkazilishi rejalashtirilgan.
Rafael Lusanning so‘zlariga ko‘ra, Ispaniya yirik sport tadbirlarini yuqori darajada o‘tkazish tajribasiga ega va 2030 yilgi mundialda asosiy mezbonlardan biri sifatida yetakchi rolni o‘ynaydi. U final aynan Ispaniyada bo‘lib o‘tishini ta’kidlagan, biroq qaysi stadion tanlanishi borasida hozircha aniq ma’lumot bermagan.
Biroq Marokash tomoni finalni Kasablanka shahridagi “Grand Stad Hassan II” stadionida o‘tkazishni taklif qilgan. Ushbu stadion 2028 yilda qurib bitkazilishi kutilmoqda va uning sig‘imi 115 ming tomoshabinni qabul qilishga mo‘ljallangan.
FIFA esa hozircha finalning qayerda bo‘lib o‘tishi bo‘yicha yakuniy qarorni e’lon qilmagan.
