2030 yilgi Jahon chempionati finali Ispaniyada bo‘lishi mumkin
2030 yilgi futbol bo‘yicha Jahon chempionati finali Ispaniyada o‘tkazilishi mumkin. Bu haqda Zamin.uz xabar berdi.
BBC manbasiga ko‘ra, bu haqda Ispaniya futbol federatsiyasi prezidenti Rafael Lusan ma’lum qilgan. Mazkur xabarni euro-football.ru sayti ham tasdiqlagan.
Musobaqaga Ispaniya, Portugaliya va Marokash birgalikda mezbonlik qiladi. Turnirning dastlabki uchta uchrashuvi esa Jahon chempionatining 100 yilligiga bag‘ishlab Janubiy Amerika davlatlari — Urugvay, Argentina va Paragvayda o‘tkazilishi rejalashtirilgan.
Rafael Lusanning so‘zlariga ko‘ra, Ispaniya ko‘p yillardan beri yirik sport tadbirlarini muvaffaqiyatli tashkil etib kelmoqda. Shu sababli, 2030 yilgi Jahon chempionatida ham yetakchi rol aynan Ispaniyaga tegishli bo‘ladi va musobaqaning final o‘yini ham ushbu mamlakatda bo‘lib o‘tadi.
Ammo hozircha qaysi stadion tanlangani haqida aniq ma’lumot berilmagan. Avvalroq Marokash vakillari chempionat finalini Kasablankadagi “Grand Stad Hassan II” stadionida o‘tkazish istagini bildirgan edi.
Ushbu stadionning qurilishi 2028 yilda yakunlanishi rejalashtirilgan bo‘lib, 115 ming tomoshabinni sig‘dira olishi aytilmoqda. Biroq FIFA final o‘yini qayerda bo‘lishi borasida hali biror rasmiy izoh bermagan.
