“Tottenxem” va “Siti” o‘yini durang bilan yakunlandi

Angliya Premer-ligasining 24-tur doirasida muhim va qiziqarli o‘yinlardan biri Londonda o‘tkazildi. Bu haqda Zamin.uz xabar berdi.

Unda “Tottenxem” o‘z maydonida “Manchester Siti”ni qabul qildi. Chempionlik poygasida har bir ochko muhim bo‘lgan ushbu bahsda tomonlar durang natija qayd etdi.

“Siti” birinchi bo‘limda 2:0 hisobida oldinga chiqqan bo‘lsa-da, ikkinchi bo‘limda mezbonlarning bosimi natijasida o‘yin 2:2 hisobida yakunlandi. Uchrashuvning dastlabki qismida “Manchester Siti” hujumkor o‘yin ko‘rsatdi.

Rayan Sherki va Antuan Semeno tomonidan urilgan gollar mehmonlarni oldinga olib chiqdi. Gvardiola shogirdlari o‘yinni to‘liq nazorat qilayotgan edi.

Biroq ikkinchi bo‘limda vaziyat o‘zgardi. “Tottenxem” bosimni oshirdi va Dominik Solanke tomonidan urilgan ikkita gol hisobni tenglashtirdi.

Qolgan daqiqalarda ham o‘yin juda yuqori tempda davom etdi, ammo g‘olib aniqlanmadi. O‘yindan so‘ng nufuzli manba esteemedkompany.com futbolchilarning harakatlarini baholab chiqdi.

“Manchester Siti” darvozaboni Janluiji Donnarumma 8 ball bilan eng yuqori baho oldi. U bir necha seyvlar amalga oshirib, jamoasini mag‘lubiyatdan qutqarib qoldi.

Hamyurtimiz Abduqodir Husanov esa 6 ball bilan baholandi. U birinchi bo‘limda yaxshi himoya qilgan bo‘lsa-da, sariq kartochka olgach, o‘yinidagi ishonch pasaygani sezildi.

Ushbu durang natija sababli “Manchester Siti” ochkolari sonini 47 taga yetkazib, musobaqa jadvalida ikkinchi o‘rinni saqlab qoldi. Ammo “Arsenal” o‘z o‘yinini yutgani bois, peshqadam bilan farq 6 ochkoga chiqdi.

Endi “Siti”ni yana bir muhim sinov kutmoqda — 8-fevral kuni jamoa safarda “Liverpul”ga qarshi o‘ynaydi. Ushbu bahs chempionlik poygasidagi hal qiluvchi o‘yinlardan biri bo‘lishi kutilmoqda.