Frank Riberi "Epshteyn fayllari"da tilga olindi

So‘nggi kunlarda ommaga oshkor qilingan "Epshteyn fayllari" butun dunyoda katta shov-shuvga sabab bo‘ldi. Bu haqda Zamin.uz xabar berdi.

Ushbu hujjatlarda futbol olami vakillari ham tilga olingan bo‘lib, ular orasida Fransiya terma jamoasining sobiq a’zosi va Germaniyaning "Bavariya" klubining sobiq futbolchisi Frank Riberi ismi ham borligi aytilgan. Bu haqda euro-football.ru xabar bermoqda.

Mazkur vaziyat yuzasidan Frank Riberining manfaatlarini himoya qilayotgan advokat Karlo Alberto Bruza ijtimoiy tarmoqlarda o‘z munosabatini bildirdi. U tarqalgan ma’lumotlarni yolg‘on deb atadi va bunday xabarlarni tarqatayotganlarga nisbatan qat’iy choralar ko‘rilishini ma’lum qildi.

Bruza o‘z bayonotida quyidagilarni yozdi: "Bu yolg‘on xabar! Ertadan boshlab janob Riberining advokati sifatida ish boshlayman va mijozim hamda uning oilasi sha’niga putur yetkazayotgan barcha yolg‘on ma’lumotlar uchun javobgarlikni ta’minlashga harakat qilaman." Ma’lum qilinishicha, Riberining ismi e’lon qilingan hujjatlarning uch sahifasida uchragan.

Unda taxmin qilinayotgan jabrlanuvchi Riberini noqonuniy fohishabozlik bilan bog‘liq aloqalarda ayblagan, shuningdek, futbolchining iltimosiga binoan uchinchi shaxs tomonidan bir kishiga hujum uyushtirilganini da’vo qilgan. Shu sababli, advokat barcha zaruriy huquqiy choralarni ko‘rishga tayyorligini qayd etgan.