Frank Riberi "Epshteyn fayllari"da ayblovlarga duch keldi

So‘nggi kunlarda dunyo bo‘ylab katta shov-shuvga sabab bo‘lgan "Epshteyn fayllari" futbol olamiga ham ta’sir ko‘rsatdi. Bu haqda Zamin.uz xabar berdi.

Mazkur hujjatlar orasida Fransiya terma jamoasining sobiq futbolchisi va Germaniyaning "Bavariya" klubi sobiq yulduzi Frank Riberining ismi tilga olingani e’tiborni tortdi. Bu haqda euro-football.ru sayti xabar bermoqda.

Vaziyat yuzasidan Frank Riberining advokati Karlo Alberto Bruza ijtimoiy tarmoqlarda bayonot bilan chiqdi. U tarqatilayotgan ma’lumotlarni asossiz va yolg‘on deb atadi.

"Bu yolg‘on! Ertaga men janob Riberining advokati sifatida chiqish qilib, mijozim va uning oilasining sha’niga zarar yetkazayotgan bu kabi yolg‘on xabarlarni tarqatayotganlarga nisbatan barcha zarur yuridik choralarni ko‘raman", — dedi advokat Bruza.

Ma’lumotlarga ko‘ra, Frank Riberining ismi "Epshteyn fayllari"ning uch sahifasida qayd etilgan. Unda Riberi noqonuniy fohishabozlikka aloqadorlikda ayblangan.

Shuningdek, iddaolarga ko‘ra, Riberining iltimosiga binoan uchinchi shaxs orqali bir kishiga hujum uyushtirilgani ham qayd etilgan. Advokat bu ayblovlarni rad etar ekan, barcha huquqiy choralar ko‘rilishini ta’kidladi.