Yevropada qishki transferlar sokin o‘tdi
Qishki transfer oynasi odatda unchalik faol bo‘lmaydi, chunki klub va futbolchilar ko‘pincha mavsum o‘rtasida jamoani o‘zgartirishdan tiyilishadi. Bu haqda Zamin.uz xabar berdi.
Bu yil ham istisno bo‘lmadi. Shunga qaramay, Yevropa klublari tarkibni kuchaytirish maqsadida ayrim qiziqarli bitimlarni amalga oshirdi.
Fransiyada katta transferlar kuzatilmadi, biroq PSJ “Barselona”dan 18 yoshli yarim himoyachi Dro Fernandesni 8,2 million yevroga sotib olib, jamoani yosh iste’dod bilan to‘ldirdi. “Monako” esa yangi futbolchilarni sotib olmasdan, ijaraga olish yo‘lidan bordi.
Himoyachi Vaut Fas “Lester”dan, Simon Adingra esa “Sanderlend”dan vaqtincha olib kelindi. Italiyada transfer bozori nisbatan faolroq bo‘ldi.
“Atalanta” Madridning “Atletiko”sidan Djakomo Raspadorini 22 million yevroga xarid qilib, katta sarmoya kiritdi. “Inter” esa “Modena”dan Yanis Massoleni sotib olib, uni hozircha ijarada qoldirdi.
“Yuventus” va “Milan” esa asosan ijaraga olish yo‘lidan bordi, “Napoli” esa hujum chizig‘ini yangilash maqsadida bir nechta futbolchini tarkibga qo‘shdi. Ispaniyada “Real” va “Barselona” qishki transferda unchalik faol bo‘lmadi.
“Barselona” “Al-Hilol”dan Joau Kanseluni ijaraga olgan bo‘lsa, “Real” hech qanday transfer amalga oshirmadi. “Atletiko” esa bir nechta xaridlarni amalga oshirdi, ammo bu darhol natija bermadi.
Angliya Premer-ligasida ham transferlar uncha ko‘p bo‘lmadi. “Manchester Siti” “Bornmut” vingeri Antuan Semenyoni 72 million yevroga olib, eng qimmat xaridni amalga oshirdi.
“Tottenhem” esa Konor Gallaxerni 40 million yevroga sotib oldi. “Arsenal”, “Chelsi”, “Liverpul” va “Manchester Yunayted” esa qishda tarkibni o‘zgartirishdan tiyildi.
Umuman olganda, qishki transferlar odatdagidek ehtiyotkorlik bilan o‘tdi. Ko‘plab klublar yozgi transfer oynasiga tayyorgarlik ko‘rmoqda.
Ma’lumotlar *euro-football.ru* saytida e’lon qilingan.
