«Al-Hilol» duranglar sabab uchinchi o‘ringa tushdi
Saudiya Arabistoni Pro-ligasida «Al-Hilol» jamoasi hali biror marta mag‘lubiyatga uchramagan bo‘lsa-da, so‘nggi o‘yinlarda ketma-ket durang natijalar qayd etgani sababli jamoa turnir jadvalida uchinchi o‘ringa tushib qolgan. Bu haqda Zamin.uz xabar berdi.
Bu holat jamoa muxlislari orasida keskin norozilik uyg‘otdi. La Repubblica nashrining xabariga ko‘ra, ayni paytda klubda bosh murabbiy Simone Indzagini iste’foga chiqarish ehtimoli haqida jiddiy gaplar tarqalmoqda.
Xususan, «Al-Hilol» muxlislari italiyalik mutaxassisning faoliyatidan qoniqmay, uning iste’fosini talab qilmoqda. Bu haqda euro-football.ru xabar bermoqda.
Shunga qaramay, Simone Indzagi vaziyatga nisbatan xotirjam munosabat bildirmoqda. Uning shartnomasi 2027 yilning o‘rtalarigacha amal qiladi va muddatidan oldin bekor qilinsa, katta miqdordagi kompensatsiya to‘lanishi ko‘zda tutilgan.
Shuningdek, Indzagi hozirda dunyodagi eng yuqori maosh oluvchi murabbiylar reytingida ikkinchi o‘rinni egallaydi. Uning yillik maoshi 26 million yevroni tashkil qiladi.
Bu esa moliyaviy jihatdan uning iste’fosini amalga oshirishni murakkablashtirishi mumkin.
