O‘zbekiston terma jamoasi AQShda qarorgohini tashkil etadi
O‘zbekiston milliy terma jamoasi 2026 yilgi jahon chempionati davomida o‘z qarorgohini AQShning Atlanta shahrida tashkil etadi. Bu haqda Zamin.uz xabar berdi.
Ushbu qaror jamoamiz uchun nafaqat qulaylik, balki turnirning logistikasi nuqtayi nazaridan ham to‘g‘ri tanlovdir. Jamoamiz musobaqa davomida Atlanta Yunayted klubiga tegishli tayyorgarlik bazasida yashaydi va mashg‘ulotlar o‘tkazadi.
Atlanta shahri FIFA tomonidan Team Base Camp variantlari qatoriga kiritilgan bo‘lib, bu shahardagi bazalardan biri Atlanta United Training Centre hisoblanadi. FIFA qoidalariga muvofiq, terma jamoalar guruh bosqichi davomida o‘z uy bazalarida yashab, o‘yinlarga charter reyslar orqali borib-keladi.
Bu esa jamoaga bir shahardan boshqasiga ko‘chib yurmasdan, asosiy tayyorgarlik markazida qolish imkonini beradi. Shuningdek, jamoa bahsdan keyin yana o‘z qarorgohiga qaytadi.
FIFA 61 dan ortiq Team Base Camp lokatsiyasini tanlab qo‘ygan bo‘lib, bu bazalar jamoalarning yashashi, tiklanishi va mashg‘ulot o‘tkazishi uchun mo‘ljallangan. Ma’lumotlarga ko‘ra, guruhimizdagi jamoalar orasida Portugaliya Palm Bich Gardensda, Kolumbiya esa Kolumbus shahrida joylashadi.
O‘zbekiston terma jamoasi uchun Atlanta nafaqat yashash manzili, balki mundialdagi katta orzu sari yo‘l olinadigan asosiy tayanch nuqtaga aylanadi. Jamoamiz aynan shu yerdan turib guruh bosqichidagi hal qiluvchi uchrashuvlarga hozirlik ko‘radi.
Bu esa muxlislar uchun ham qiziqarli manzara bo‘ladi, chunki tarixiy mundialda O‘zbekistonning Amerikadagi "uyi" Atlanta bo‘ladi. Manba: O‘FA matbuot xizmati.
