Oksana Chusovitina Boku Jahon Kubogi finalida ishtirok etadi
Ozarbayjon poytaxti Boku shahrida sport gimnastikasi bo‘yicha nufuzli Jahon kubogi musobaqalari qizg‘in davom etmoqda. Bu haqda Zamin.uz xabar berdi.
Ushbu musobaqaning dastlabki saralash bosqichlari o‘tkazilib, unda tajribali gimnastikachimiz Oksana Chusovitina o‘z mahoratini namoyish etdi. Oksana tayanib sakrash dasturida muvaffaqiyatli ishtirok etib, final bosqichiga yo‘llanma oldi.
Saralash bosqichida hakamlar uning chiqishini 13.049 ball bilan baholashdi, bu esa unga umumiy jadvalda uchinchi o‘rinni egallash imkonini berdi va finalga chiqishiga sabab bo‘ldi. Hal qiluvchi bellashuvlar 7 mart kuni bo‘lib o‘tadi.
Shuningdek, Oksana bugun to‘sinda mashq bajarish dasturida ham o‘z omadini sinab ko‘radi. Erkaklar o‘rtasidagi musobaqalarda esa vakillarimiz uchun bahslar biroz qiyin kechdi.
Abdulaziz Mirvaliyev va Humoyun Ismoilov erkin mashq dasturida, Rasuljon Abdurahimov esa parallel brusda o‘z chiqishlarini namoyish etishdi. Afsuski, ularning to‘plagan ballari final bosqichiga chiqish uchun yetarli bo‘lmadi.
Milliy olimpiya qo‘mitasi ma’lumotiga ko‘ra, gimnastikachilarimiz kelgusi musobaqalarda yaxshiroq natijalar ko‘rsatish uchun tayyorgarlikni davom ettirishadi. Manba: One.uz.
