Ivan Elgera "Real" murabbiylar almashinuvini tanqid qildi
"Real Madrid"ning sobiq himoyachisi Ivan Elgera klubdagi murabbiylar almashinuvi haqida o‘zining tanqidiy fikrlarini bildirdi. Bu haqda Zamin.uz xabar berdi.
U "Bajo Palos" podkastida Xabi Alonsoning ishdan bo‘shatilishini shoshilinch va asossiz qaror deb atadi. Elgeraning so‘zlariga ko‘ra, Alonso qo‘l ostida jamoa ayniqsa himoyada juda tartibli va mustahkam o‘yin namoyish etayotgan edi.
Sobiq futbolchi klub rahbariyatining qarorlarini tushunish qiyinligini ta’kidladi. Uning fikricha, "Real Madrid"dek yirik klubda ishlash uchun tajribali mutaxassis kerak edi.
Elgera uzoq yillar davomida "Kastilya"ni boshqargan Raulning bu lavozimga ko‘proq mos kelishini, u klubning muhitini va qadriyatlarini yaxshi tushunishini alohida qayd etdi. Shuningdek, Ivan Elgera Alvaro Arbeloaning tayinlanishiga ham shubha bilan qaradi.
U yuqori divizionda tajribasi bo‘lmagan murabbiyni asosiy tarkibga jalb qilish mantiqsiz deb hisoblaydi. Elgeraning fikricha, bu holat "Real Madrid" uchun navbatdagi xato va ma’nosiz qarordir.
Manba: One.uz.
