Shomurodovning o'tishi Rimni xato tanlovga olib keldi
O'zbekiston milliy terma jamoasining sardori Eldor Shomurodov joriy futbol mavsumi oldidan Italiyaning Roma klubi tarkibini tark etib, Turkiyaning Istanbul Bashakshehir jamoasiga ijara asosida o'tib ketganidan so'ng haqiqiy ma'noda ochilib ketdi. Bu haqda Zamin.uz xabar berdi.
U ilgari ham maydondagi mehnatsevarligi va kurashchanligi bilan e'tiborni tortgan bo'lsa-da, Istanbulda shunchaki ishchi hujumchi emas, balki natija beruvchi asosiy gol mashinasiga aylandi. Qizig'i shundaki, Eldor o'tgan mavsumning ikkinchi yarmini mashhur murabbiy Klaudio Raneri qo'l ostida ancha yuqori darajada o'tkazganiga qaramay, rimliklar uni qo'ldan chiqardilar.
Klub rahbariyati o'rniiga Angliyadan yosh forvard Evan Fergyusonga e'tibor qaratdi. Ammo vaqt o'tishi bilan bu qarorning bahosi chiqmoqda, chunki Rimda tanlov xato bo'lib qolgan bo'lsa, Istanbulda Shomurodov o'z javobini maydonda aniq beryapti.
Roma jamoasining hayotini doimiy yoritib boradigan forzaroma.info sayti ekspertlari ushbu masalaga alohida to'xtab, klub rahbariyati xatoga yo'l qo'ygan bo'lishi mumkinligini yozishdi. Ularning fikricha, Roma bu qaroridan yetarlicha afsuslanmoqda va bosh murabbiy Jan-Pero Gasperini mavsumning eng muhim pallasida Shomurodovning jamoada qolishiga umuman qarshi bo'lmagan edi.
Eng ta'sirli raqamlar esa hech narsani yashirmaydi, chunki Shomurodov o'z o'rniga kelgan Evan Fergyusondan besh baravar ko'p gol urmoqda. Turkiya chempionatida u Viktor Osimxen va Mauro Ikardi kabi A Seriyaning havosini olgan mashhur yulduzlarni ham ortda qoldirgani qayd etildi.
Bugungi kunda Superligada o'noltita gol urib turgan Eldor, agar Romada qolganida, qishda kelgan va to'purarlik mahoratini ko'rsatayotgan Doniell Malen bilan juda mos sherik bo'lishi mumkin edi. Fergyuson uchun mavsum ancha erta so'nib qolgani aytiladi, Eldor esa aksincha, Turkiya chempionati to'purarlar poygasida jonli kurash olib boryapti va faqat nigeriyalik Pol Onuachudan ortda qolyapti.
Shu bilan birga, to'purarlar bahsida Shomurodov Mauro Ikardi va Taliskadan uchta, Viktor Osimxen va Marko Asensiodan to'rtta golga oldinda borayotgani ta'kidlanadi, bu esa uning mavsumdagi barqarorligini yanada yorqin ko'rsatadi. Moliyaviy jihat ham qiziq, chunki Istanbul Bashakshehir rimliklar bilan ijara shartnomasi tuzganda, agar jamoa Superligadagi o'rnini saqlab qolsa, Eldor Shomurodovning transfer huquqini ikki million sakkiz yuz ming yevro to'lab to'liq sotib olishga kelishgan.
Ta'kidlanishicha, bu Roma o'zini ko'rsata olmagan va A Seriyada atigi uchta gol urgan Evan Fergyuson uchun to'lagan uch million yevrodan ham arzonroq summa hisoblanadi. Eng muhim nuqta shundaki, Bashakshehir bu mavsum ligada qolish uchun emas, aksincha yevrokuboklar yo'llanmasi uchun kurashmoqda.
Ayni paytda istanbulliklar Turkiya chempionatidagi an'anaviy kuchli klublar Galatasaroy, Fenerbahche, Trabzonspor va Beshiktoshdan keyin beshinchi o'rinda joylashgan. Va bu natijada Shomurodovning qimmatli gollari hal qiluvchi rol o'ynayotgani ochiq aytilyapti.
Shu bois, forzaroma.info yozishicha, Istanbul Bashakshehir endi o'zbek hujumchisini qo'ldan chiqarishni istamaydi va uning kelajagi ancha porloq ko'rinmoqda. Manba: forzaroma.info
