Krishtianu Ronaldu Portugaliya terma jamoasida zaxira o‘rindig‘iga o‘tkazilishi mumkin

Portugaliya terma jamoasining sardori Krishtianu Ronaldu o‘z faoliyatidagi so‘nggi Jahon chempionatiga jiddiy hozirlik ko‘rmoqda. Bu haqda Zamin.uz xabar berdi.

Biroq uning jamoa tarkibidagi o‘rni va ahamiyati yana qizg‘in bahs-munozaralarga sabab bo‘lmoqda. Al-Nasr klubi hujumchisi o‘zining boy sovrinlar kolleksiyasidagi yagona yetishmayotgan g‘alabani qo‘lga kiritishni maqsad qilgan bir paytda, AQSH terma jamoasining sobiq futbolchisi Teylor Tvellman kutilmagan bayonot bilan chiqdi.

Bu haqda Goal.com nashri xabar bermoqda. Tvellmanning fikriga ko‘ra, 2026-yilgi Jahon chempionati arafasida Roberto Martines ixtiyorida bo‘lgan yulduzli tarkib Krishtianu Ronaldu zaxirada qolsagina o‘zining eng yaxshi o‘yinini ko‘rsata oladi.

Ekspertning ta’kidlashicha, hozirgi tarkib Portugaliya futboli tarixidagi eng kuchli va mahoratli jamoa hisoblanadi. Uning ishonchi komilki, Ronaldu maydonda bo‘lmasa, jamoaviy harakatlar yanada samaraliroq va shiddatliroq ko‘rinish oladi.

Ronaldosiz o‘yin tarafdorlari Portugaliya terma jamoasidagi ulkan zaxira kuchiga e’tibor qaratishmoqda. Avvalgi turnirlardan farqli o‘laroq, endilikda gol urish mas’uliyati faqat birgina futbolchi zimmasida emas.

Bruno Fernandesh, Bernardu Silva va Rafael Leao kabi ijodkor o‘yinchilar bilan bir qatorda, Gonsalu Ramush va Pedro Neto kabi hujumchilar ham jamoaning hujumkorligini ta’minlashga qodir. Bu esa jamoaning o‘yin uslubini rang-barang qilish imkonini beradi.

Himoya chizig‘ida ham Ruben Diash, Nunu Mendesh va Joau Kanselu kabi dunyo darajasidagi ijrochilar borligi Portugaliyani har qanday raqib uchun xavfli jamoaga aylantiradi. Ko‘plab mutaxassislar jamoa zamonaviyroq va yuqori bosimga asoslangan futbolga o‘tishi kerakligini aytishmoqda.

Bunday uslub esa 41 yoshli Ronaldoning jismoniy holatiga mos kelmasligi mumkinligi haqida xavotirlar mavjud. Krishtianu Ronaldu uchun ushbu turnir rekord darajadagi oltinchi Jahon chempionati bo‘ladi.

Uning azaliy raqibi Lionel Messi amaldagi chempion sifatida musobaqaga tashrif buyurayotgan bir paytda, Ronaldu o‘zining buyuk faoliyatini jahon toji bilan yakunlashni istaydi. Roberto Martines hozircha o‘z sardorini to‘liq qo‘llab-quvvatlamoqda va guruh bosqichida O‘zbekiston, Kolumbiya hamda Kongo DR kabi raqiblarga qarshi bahslarda uning boy tajribasiga tayanmoqchi.