FIFA har bir federatsiyaga 40 million dollar taklif qildi
FIFA prezidenti Janni Infantino futbol olamida katta shov-shuvga sabab bo‘lgan tashabbus bilan chiqdi. Bu haqda One.uz xabar beradi.
U Jahon chempionati tijoriy va ko‘rsatuv huquqlarining bir qismini tashqi investorlarga sotish rejasini amalga oshirish maqsadida tashkilotga a’zo 211 ta futbol assotsiatsiyasiga misli ko‘rilmagan moliyaviy taklif yubordi. Unga ko‘ra, agar ushbu loyiha qo‘llab-quvvatlansa, har bir milliy federatsiya 40 million dollardan mablag‘ olishi mumkin bo‘ladi.
Zamin.uz nashri bergan ma’lumotlarga ko‘ra, umumiy qiymati 10 milliard dollarga baholanayotgan ushbu kelishuv futbol tarixidagi eng yirik va bahsli bitimlardan biriga aylanishi kutilmoqda. Qaror qabul qilish uchun qisqa muddat Nufuzli The Times nashri tarqatgan xabarga ko‘ra, Infantino taklif qilayotgan yangi tizim 2027-yilning 1-yanvaridan e’tiboran kuchga kirishi ko‘zda tutilgan.
Biroq eng asosiy munozara qaror qabul qilish uchun belgilangan muddat ustida bormoqda. FIFAga a’zo mamlakatlar ushbu yirik moliyaviy paketni qabul qilish yoki rad etish bo‘yicha atigi 53 kun ichida o‘z xulosalarini berishlari kerak.
Bunday qisqa vaqt ichida strategik qaror qabul qilinishi kerakligi ko‘plab savollarni yuzaga keltirmoqda. FIFA rahbari a’zo mamlakatlarga yo‘llagan rasmiy maktubida ikki xil tanlov borligini ta’kidlagan.
Birinchi variantga ko‘ra, agar assotsiatsiyalar 10 milliard dollarlik paketni ma’qullasa, futbolni rivojlantirishning yangi bosqichi boshlanadi va har bir a’zo davlat sezilarli darajada boyiydi. Ikkinchi variant esa mavjud holatni saqlab qolishni istaganlar uchun bo‘lib, bunda FIFA avvaldan rejalashtirilgan Forward dasturini 2,7 milliard dollargacha kengaytirish bilan cheklanadi.
Keskin tanqidlar va korrupsiya gumonlari Janni Infantinoning ushbu rejasi futbol jamoatchiligi va soha mutasaddilari tomonidan iliq kutib olinmadi. Aksincha, bu harakat keskin tanqidlarga uchramoqda.
Kelishuvga qarshi chiqayotgan tomonlar FIFA prezidentining har bir mamlakatga 40 million dollar va’da qilib, qaror uchun juda qisqa muddat belgilashini a’zo assotsiatsiyalar ovozini sotib olishga qaratilgan ochiq urinish deb baholamoqdalar. Ba’zi tanqidchilar buni futbol olamidagi ochiqchasiga pora berish taktikasi deb atashmoqda.
Loyiha tafsilotlariga ko‘ra, tashqi investorlarni Jahon chempionati huquqlariga sherik qilish FIFAning moliyaviy imkoniyatlarini keskin oshirishi mumkin. Biroq bu futbolning mustaqilligi va an’anaviy boshqaruv tizimiga qanchalik ta’sir qilishi hozircha noma’lum.
2027-yildan boshlanadigan navbatdagi sikl davomida har bir a’zo federatsiyaga va’da qilingan mablag‘lar jahon futboli xaritasini o‘zgartirib yuborishi mumkin, ammo buning evaziga beriladigan huquqlar kelajakda tashkilot uchun qimmatga tushishi ehtimoldan xoli emas.
