Toshkent viloyatida qishloq xo‘jaligi yerlaridan ikki yo‘nalishda foydalanish imkonini beruvchi noyob loyiha amalga oshirilmoqda. Bu haqida Zamin.uz xabar berdi.
Bu haqda Ekologiya, atrof-muhitni muhofaza qilish va iqlim o‘zgarishi vazirligi huzuridagi Davlat ekologik ekspertizasi markazi ma’lum qildi. Toshkent tumanida “Agri-PV” agro-fotovoltayik loyihasiga bag‘ishlangan jamoatchilik eshituvi tashkil etildi.
Tadbir Sabzavot, poliz ekinlari va kartoshkachilik ilmiy-tadqiqot instituti binosida o‘tkazildi. Unda mahalliy aholi vakillari, davlat tashkilotlari mutasaddilari hamda ekologik ekspertlar ishtirok etdi.
Eshituvida loyihaning maqsadlari, amalga oshirish bosqichlari va atrof-muhitga ta’siri haqida batafsil ma’lumot berildi. Loyiha O‘zbekiston Respublikasi Prezidentining 2022 yil 9 sentyabrdagi 220-son farmoni hamda Vazirlar Mahkamasining 2020 yil 7 sentyabrdagi 541-son qarori ijrosi doirasida amalga oshirilmoqda.
Uni “Business Advanced Experts” MCHJ va fransuzlarning “VOLTALIA” kompaniyasi bilan hamkorlikda amalga oshirish rejalashtirilgan. Quyosh stansiyasi quvvati 507,78 kVt/s bo‘lib, 1,5 gektar yer maydonida quriladi.
Loyihaning bir gektar qismida 819 ta quyosh paneli o‘rnatiladi. Qurilish ishlari 2025 yil avgust oyida boshlanib, 2026 yil fevralga qadar yakunlanadi.
Agro-fotovoltayik texnologiyasi qishloq xo‘jaligi yerlaridan ikki tomonlama foydalanishga imkon yaratadi. Bu orqali yerda poliz va sabzavot ekinlari yetishtirilishi bilan birga elektr energiyasi ishlab chiqariladi.
Natijada suv resurslari tejaladi, hosildorlik oshadi va fermerlar uchun qo‘shimcha daromad manbai paydo bo‘ladi. Shuningdek, qurilish jarayonida 25 nafar ishchi ish bilan ta’minlanishi rejalashtirilgan.
Jamoatchilik eshituvida loyihaning ekologik va ijtimoiy ta’siri ham muhokama qilindi. Qurilish paytida yuzaga kelishi mumkin bo‘lgan shovqin, chiqindilar va havo changalanishi kabi muammolar haqida ma’lumot berildi.
Ularni kamaytirish uchun chiqindilarni alohida yig‘ish, maxsus poligonlarga chiqarish, qurilish maydonini suv bilan namlash va og‘ir texnikadan faqat kunduzgi soatlarda foydalanish kabi chora-tadbirlar ko‘rilishi ta’kidlandi. Bu loyihaning atrof-muhitga zarar yetkazmasdan amalga oshirilishini ta’minlashga qaratilgan.
