Toyoake shahri smartfon foydalanishni cheklashni tavsiya qildi
Yaponiyaning Toyoake shahri hokimiyati aholini internet va smartfondan ortiqcha foydalanishdan himoya qilish maqsadida kunlik foydalanish vaqtini ikki soat bilan cheklashni tavsiya etdi. Bu haqida Zamin.uz xabar berdi.
Bu haqda The Guardian nashri ma’lumot berdi. Shahar meri Masafumi Koki bildirishicha, bunday cheklov odamlarning sog‘lig‘i va uyqu tartibini yaxshilash, shuningdek, gadjetlarga haddan tashqari bog‘lanishni kamaytirish uchun zarurdir.
Ushbu chora oktyabr oyidan joriy etilishi mumkin. Jarima yoki majburiy choralar ko‘zda tutilmagan, tavsiya ixtiyoriy bo‘lib, bolalar va kattalar uchun mo‘ljallangan.
Loyihaga ko‘ra, 6 yoshdan 12 yoshgacha bo‘lgan bolalar soat 21:00 dan keyin, o‘smirlar va kattalar esa 22:00 dan keyin smartfon va planshetlarni ishlatmasliklari tavsiya qilinadi. Biroq, hukumatning bu taklifi ijtimoiy tarmoqlarda salbiy munosabatlarga sabab bo‘ldi.
Ko‘plab foydalanuvchilar buni shaxsiy erkinlikka aralashish va amalda bajarib bo‘lmaydigan qaror deb hisoblamoqda. 69 ming aholiga ega shaharda cheklov e’lon qilingach, mahalliy hokimiyatga yuzlab shikoyatlar kelib tushdi, ulardan 80 foizdan ortig‘i taklifga tanqidiy munosabat bildirdi.
Mer bu tashabbus oilalarga smartfondan foydalanish vaqtini baholash va bu borada fikr almashish imkonini yaratishiga umid qilmoqda. Rasmiylar ta’kidlaganidek, loyiha bolalar va kattalar orasida telefonga bog‘liqlikdan kelib chiqadigan muammolarni kamaytirishga qaratilgan.
Masalan, maktablarda smartfondan foydalanish taqiqlangach, ba’zi o‘quvchilar o‘qishdan uzoqlasha boshlagan. Shuningdek, shaxsiy vaqtni telefonga sarflash oqibatida uyqu buzilishi va oilaviy muloqotning kamayishi holatlari ham kuzatilmoqda.
Shu sababli, bunday choralarning aholi sog‘lig‘i va farovonligini yaxshilashga xizmat qilishi kutilmoqda.
