Germaniyada Yevropaning eng kuchli superkompyuteri ishga tushdi
Germaniyada Yevropaning eng kuchli superkompyuteri bo‘lgan Jupiter rasmiy ravishda foydalanishga topshirildi. Bu haqida Zamin.uz xabar berdi.
Ushbu marosim Germaniyaning Yulix shahrida bo‘lib o‘tdi. Jupiter superkompyuteri zamonaviy Nvidia protsessorlari asosida yaratilgan bo‘lib, soniyasiga bir kvintillion hisob-kitoblarni bajarish imkoniyatiga ega.
Bu ko‘rsatkich taxminan o‘n million oddiy noutbukning umumiy ishlash quvvatiga tengligi ta’kidlandi. Jupiter superkompyuteri Yevropa uchun strategik ahamiyatga ega hisoblanadi.
Loyihani Fransiyaning Atos IT guruhi va Germaniyaning ParTec kompaniyasi hamkorlikda ishlab chiqqan. Marosimda Germaniya kansleri Fridrix Mers ishtirok etib, bu loyiha Yevropaga AQSH va Xitoy kabi davlatlar bilan sun’iy intellekt sohasida raqobatlashish imkonini kengaytirishini ta’kidladi.
Superkompyuterdan foydalanish sohalari juda keng. Jumladan, Jupiter biotexnologiya, iqlim o‘zgarishlarini o‘rganish, tibbiy tahlillar, ilmiy tadqiqotlar va fan sohalarida qo‘llanilishi rejalashtirilgan.
Ushbu tizim yordamida genetika, dori vositalarini yaratish va global ekologik muammolarni tahlil qilishda yangi imkoniyatlar ochiladi. Shunday qilib, Jupiter superkompyuteri Yevropaning ilmiy va texnologik salohiyatini sezilarli darajada oshirishga xizmat qiladi.
