BBC jurnalistiga xakerlardan ish kompyuteriga kirish taklifi kelib tushdi

BBCning kiberxavfsizlik bo‘yicha muxbiri Jo Tidi jinoyatchilardan g‘alati taklif oldi. Bu haqda Zamin.uz xabar berdi.

Ular jurnalistdan ish kompyuteriga kirish huquqini so‘rab, buning evaziga katta miqdorda pul berishga tayyor ekanliklarini bildirishdi. O‘zlarini “Medusa” deb atagan guruh dastlab 15 foiz ulush, keyinchalik esa 25 foizgacha “sovg‘a” berishga va’da qilgan.

Ularning asosiy maqsadi BBC ma’lumotlarini o‘g‘irlab, kompaniyani tovon puli to‘lashga majburlash edi. Xakerlar jurnalistga maxfiy kod yuborib, uni kompyuterida ishga tushirishni so‘rashgan.

Shuningdek, telefoniga ko‘plab so‘rovlar jo‘natib, akkaunt parolini buzishga harakat qilishgan. BBCning axborot xavfsizligi bo‘limi holatni tezda aniqlab, jurnalistni tizimdan uzib qo‘ydi va qo‘shimcha himoya choralarini ko‘rdi.

Mutaxassislar bunday kiberhujumlarning xavfi ortib borayotganini ta’kidlashmoqda. Shu bois, axborot xavfsizligiga alohida e’tibor qaratish zarur.

Kiberhujumlar har doim ham oldindan ko‘rilmaydi, shuning uchun ehtiyot choralarini kuchaytirish muhimdir.