Buyuk Britaniyada Apple va Samsungga da’vo qo‘yildi
Buyuk Britaniyada 2015 yildan 2024 yilgacha Apple yoki Samsung telefonlarini sotib olgan taxminan 30 million foydalanuvchi kompensatsiya olish imkoniyatiga ega bo‘lishi mumkin. Bu haqda Zamin.uz xabar berdi.
Iste’molchilar huquqlarini himoya qiluvchi Consumer Watchdog tashkiloti sudga da’vo arizasi bilan murojaat qilgan. Har bir foydalanuvchiga o‘rtacha 17 funt sterling miqdorida to‘lov amalga oshirilishi kutilmoqda.
Da’voga ko‘ra, ayrim yirik kompaniyalar Apple va Samsung telefon qismlari uchun ortiqcha narx belgilagan. Bu esa telefonlarning umumiy narxini oshirib, xaridorlarga moliyaviy zarar yetkazgan.
Sud jarayoni besh hafta davom etadi va uning yakunlari asosida qaror qabul qilinadi. Agar Consumer Watchdog g‘alaba qozonsa, talab qilinayotgan jami 480 million funt sterling foydalanuvchilar o‘rtasida teng taqsimlanadi.
Kompaniya ilgari ushbu da’voni asosga ega emas deb hisoblagan. Shu bilan birga, boshqa davlatlarda ham yirik ishlab chiqaruvchilar shunga o‘xshash sud jarayonlari bilan yuzlashmoqda.
Tashkilot bosh direktori Anabel Houltning ta’kidlashicha, mazkur sud jarayoni iste’molchilarning yirik kompaniyalarni javobgarlikka tortish imkoniyatini ko‘rsatadi va ularning huquqlarini himoya qilishda muhim ahamiyatga ega. Bu holat iste’molchilarning manfaatlarini himoya qilish borasida yangi bosqich hisoblanadi.
