Buyuk Britaniyada telefon o‘g‘irlik guruhi fosh etildi
Buyuk Britaniya politsiyasi mamlakatdan Xitoyga o‘g‘irlangan 40 mingga yaqin mobil telefonni jo‘natgan xalqaro jinoiy guruhni fosh qildi. Bu haqda Zamin.uz xabar berdi.
London va Hertfordshirdagi 28 manzilda o‘tkazilgan reydlar natijasida 18 kishi hibsga olindi, shuningdek, 2 mingdan ortiq telefon topildi. Tergov bir jabrlanuvchining o‘g‘irlangan iPhone telefonini kuzatish orqali boshlandi.
Telefon London yaqinidagi omborga olib borilgach, politsiya u yerdan yana yuzlab qurilmalarni aniqladi va bu holat xalqaro kontrabanda tarmog‘ining mavjudligini ko‘rsatdi. Qo‘lga olinganlar orasida ikki afg‘on va bir hind fuqarosi bor.
Ular o‘g‘irlangan mol-mulkni yashirishda ayblanmoqda. Keyinchalik o‘tkazilgan reydlarda yana 15 kishi, asosan ayollar, hibsga olindi.
Politsiya ma’lumotlariga ko‘ra, ushbu guruh Londondagi telefon o‘g‘irliklarining 40 foizigacha javobgar bo‘lishi mumkin. Mutasaddilar o‘g‘irlangan iPhone’larning ko‘pi Xitoyda qimmat narxda sotilayotganini ta’kidladi.
Bu esa jinoyatni foydali va katta hajmdagi biznesga aylantirmoqda. Ushbu holat xalqaro darajada telefon o‘g‘irliklari va kontrabandaga qarshi kurashishda muhim ahamiyatga ega.
