Nike motorli krossovka prototipini taqdim etdi
Dunyoning yetakchi sport brendlaridan biri bo‘lgan Nike yangi texnologik yangilikni taqdim etdi. Bu haqda Zamin.uz xabar berdi.
Kompaniya o‘zining rasmiy sayti orqali “Project Amplify” nomli motorli krossovkalar prototipini ommaga namoyish qildi. Ushbu loyiha hozircha sinov bosqichida bo‘lib, kelajakda sport va kundalik yurish jarayonlarini tubdan o‘zgartirishi kutilmoqda.
“Project Amplify” krossovkalari foydalanuvchining yurish yoki yugurish harakatini sensorlar yordamida aniqlaydi va harakatga yordam beruvchi motorlar orqali qo‘shimcha quvvat beradi. Ichki batareya tizimi va maxsus sensorlar oyoq harakatini tahlil qilib, yurishni yengillashtiradi hamda charchoqlarni kamaytiradi.
Bu texnologiya ayniqsa uzoq masofaga yuradigan sportchilar, reabilitatsiya jarayonidagi bemorlar va yurish qiyin bo‘lgan keksa yoshdagilar uchun foydali hisoblanadi. Hozirda ushbu model ommaviy ishlab chiqarishga tayyor emas, u prototip sifatida ishlab chiqilgan.
Nike kompaniyasi foydalanuvchilarning fikr-mulohazalarini yig‘ib, kelajakda mahsulotning qulayligi va samaradorligini oshirishni maqsad qilgan. Shu tariqa, motorli krossovkalar sport va kundalik hayotda yurishni yanada osonlashtirishi kutilmoqda.
