HUMO va Alipay+ xalqaro QR-to‘lovlarni yo‘lga qo‘ydi

Milliy to‘lov tizimi HUMO va xalqaro to‘lov platformasi Alipay+ (Ant International tarkibida) xalqaro QR-to‘lovlarni rivojlantirish maqsadida hamkorlik o‘rnatdi. Bu haqda Zamin.uz xabar berdi.

Ushbu kelishuv Pekinda imzolanganligi Business Wire tomonidan ma’lum qilindi. Dastlabki bosqichda HUMO foydalanuvchilari o‘z bank ilovalari yoki elektron hamyonlari orqali xorijda, xususan, Xitoy, Qozog‘iston, Tailand, Birlashgan Arab Amirliklari va Amerika Qo‘shma Shtatlarida so‘mda to‘lovlarni amalga oshirish imkoniyatiga ega bo‘ladi.

Alipay+ tizimiga birinchi bo‘lib Octobankning Octomobile elektron hamyoni integratsiya qilinadi. Yil oxirigacha boshqa HUMO ishtirokchilari ham ushbu tizimga qo‘shilishi rejalashtirilgan.

Hamkorlik shuningdek, Alipay+ foydalanuvchilariga O‘zbekistondagi savdo nuqtalarida to‘lovlarni amalga oshirish imkoniyatini beradi. Bu esa turizm va chakana savdo sohalarida yangi imkoniyatlar yaratadi.

HUMO boshqaruv kengashi raisining birinchi o‘rinbosari Maksad Muxitdinovning ta’kidlashicha, mazkur kelishuv o‘zbekistonlik foydalanuvchilarga butun dunyo bo‘ylab sayohat qilish va to‘lovlarni amalga oshirishda qulaylik yaratadi, biznes uchun esa auditoriyani kengaytirish imkonini taqdim etadi. Hozirgi kunda HUMO tizimida mamlakatdagi 35 ta bank va 42 ta no-bank moliyaviy tashkilot birlashgan.

Alipay+ning Janubi-Sharqiy Osiyo, Avstraliya va Janubiy Osiyo bo‘yicha bosh menejeri Edvard Yue hamkorlik Alipay+ning Markaziy Osiyodagi faoliyatini kengaytirib, 45 milliondan ortiq raqamli hamyon foydalanuvchilarini qamrab olishini ta’kidladi. Alipay+ 40 dan ortiq elektron hamyon va bank ilovalarini, shuningdek, 10 ta milliy QR-to‘lov tizimlarini birlashtirgan bo‘lib, 1,8 milliard iste’molchi akkauntlari va 100 milliondan ortiq savdo nuqtalarini bog‘laydi.

Bu hamkorlik mintaqaviy to‘lov infratuzilmasini yanada rivojlantirishga xizmat qiladi.