Xiaomi yangi issiq bug'li simsiz pol tozalagichni taqdim etdi
Xiaomi kompaniyasi qattiq pol yuzalarini tozalash uchun maxsus mo'ljallangan yangi simsiz changyutgichni taqdim etdi. Bu haqda Zamin.uz xabar berdi.
Bu qurilma Mijia Floor Scrubber 5 Max deb nomlangan bo'lib, bir vaqtning o'zida uchta turli tozalash usulini birlashtiradi. Ushbu tizim issiq bug', qalin ko'pik va yuqori haroratdagi suv yordamida ishlaydi.
Ishlab chiquvchilarning aytishicha, yangi uskunaning asosiy maqsadi kuchli kirni, yog'li dog'larni va yopishqoq suyuqliklarni oddiy pol tozalagichlarga qaraganda ancha samaraliroq olib tashlashdir. Yangi model 160 gradus haroratdagi issiq bug'ni ishlatadi.
Bu esa kirni bo'shashtirish, qiyin chiqadigan dog'larni olib tashlash va yuzalarni ta'mirlashga yordam beradi. Shu bilan birga, qurilma yog'li izlarni yo'qotish uchun maxsus ko'pikni sepadi.
Sharbat yoki shirin suyuqliklardan qolgan izlarni yumshatish uchun esa 90 gradus issiq suv ishlatiladi. Qurilmaning so'rish quvvati 28 000 pasxalgacha yetib boradi.
Unda ho'l va quruq chiqindilarni tozalash uchun maxsus rolikli cho'tka hamda soch o'ralib qolishini oldini olish uchun to'rt qatlamli kesgich o'rnatilgan. Yangi changyutgichda infraqizirli sensorlar yordamida chetlarni tozalash texnologiyasi ham mavjud.
Bu funksiya qurilmaga devorlar, mebel oyoqlari va shkaf chetlariga yaqin joylarni ham mukammal tozalash imkonini beradi. Texnik xizmat ko'rsatish jarayonini osonlashtirish maqsadida qurilma o'z-o'zini tozalash rejimiga ega.
U avtomatik ravishda qaynoq suv bilan yuviladi, dezinfeksiya qilina va so'ngra rolik issiq havo bilan quritiladi. Batareya sig'imi 6300 milliamper soatni tashkil qiladi va bu qurilmani uzluksiz 70 daqiqa davomida ishlatish imkonini beradi.
Qurilma bir litrli toza suv idishi va 700 millilitrlik iflos suv konteyneri bilan jihozlangan. Shuningdek, u aqlli uy tizimlari bilan bog'lanish qobiliyatiga ega bo'lib, rangli displey orqali ishlash rejimi va batareya holati haqida ma'lumot beradi.
Ushbu yangi model hozirda Xitoydagi YouPin platformasida 2999 yuandan sotuvga qo'yilgan.
