GAC Group xavfsiz va tez quvvatlanuvchi batareyalar yaratdi
Avtomobilsozlik sanoati giganti hisoblangan GAC Group kompaniyasining inkubatori Greater Bay Technology startapi to‘liq qattiq holatli batareyalar prototipini ishlab chiqdi. Bu haqda Zamin.uz xabar berdi.
Kompaniya vakillarining ta’kidlashicha, yangi texnologiya yordamida xavfsizlik, energiya zichligi va quvvatlanish tezligi o‘rtasidagi muhim muvozanatni ta’minlashga erishildi. Muhandislar organik va anorganik komponentlar uyg‘unligidan iborat gibrid elektrolit moddasini yaratdilar.
Ushbu material mo‘rt keramika yoki zaharli sulfidlardan foydalaniladigan avvalgi variantlardan tubdan farq qiladi. Yangi ishlab chiqilgan yonmaydigan material maxsus sinovlar, jumladan, mexanik zarbalar va yuqori harorat ta’sirini tekshirish bosqichlaridan muvaffaqiyatli o‘tdi.
Yangi batareyalarning energiya zichligi kilogrammiga 260 dan 500 vattgacha yetadi. Bu ko‘rsatkich hozirgi kunda keng qo‘llanilayotgan litiy ionli elementlarning 250-300 vattli imkoniyatlaridan sezilarli darajada yuqoridir.
Bunday texnologiya avtomobillarning bir marta quvvatlanishda bosib o‘tadigan masofasini yanada oshirish imkonini beradi. Shuningdek, ushbu innovatsiya an’anaviy akkumulyatorlar kabi uzoq xizmat muddati bilan birga, to‘liq quvvatlanish vaqtini 20 dan 30 daqiqa gacha qisqartiradi.
Greater Bay Technology kompaniyasi elektrolit tarkibi va ishlab chiqarish jarayonlari bo‘yicha allaqachon ellikdan ortiq patent hujjatlarini topshirgan. Yangi batareyalarni ommaviy ishlab chiqarish 2026 yilning oxiriga borib Guanchjou shahrining Nansha tumanidagi zavodda boshlanishi rejalashtirilgan.
Dastlabki partiyalar GAC kompaniyasining yuqori toifali Hyptec avtomobillariga o‘rnatiladi. Ma’lumotlarga ko‘ra, 2026 yilning mart oyiga kelib kompaniya Xitoy bozorida ma’lum ulushga ega bo‘lgan va o‘z quvvatlarini kengaytirmoqda.
